ბათუმის საჯარო ბიბლიოთეკიდან წიგნების გადატანა დაიწყეს

ბათუმის საჯარო ბიბლიოთეკიდან წიგნების გადატანა დაიწყეს. წიგნები ბიბლიოთეკიდან სანდასუფთავების მანქანით გადააქვთ.

წიგნები საჯარო ბიბლიოთეკის შენობის რეაბილიტაციამდე ბათუმის საფეხბურთო სტადიონზე იქნება დასაწყობებული.

საბიბლიოთეკო ფონდის შეფუთვისა და შენახვისათვის ბათუმის მერიას ბიუჯეტიდან 52 000 ლარი აქვს გამოყოფილი.

ვაჟა-ფშაველას ქუჩაზე ბიბლიოთეკის შენობა ავარიულობის მიზეზით 2022 წლის მაისში დაკეტეს, ბიბლიოთეკის თანამშრომლები კი გაურკვეველი ვადით დაითხოვეს.

ბათუმის საჯარო ბიბლიოთეკის შენობის გამაგრება-რეაბილიტაციისთვის საქალაქო ინფრასტრუქტურისა და კეთილმოწყობის სამმართველომ ტენდერი 2022 წლის აგვისტოში  გამოაცხადა.

ტენდერში შპს „სამშენებლო-საპროექტო ჯგუფმა“ გაიმარჯვა. კომპანიასთან გაფორმებული ხელშეკრულების თანახმად, ბათუმის საჯარო ბიბლიოთეკის რეაბილიტაციისათვის 1 482 761 ლარი დაიხარჯება.

გამარჯვებულმა კომპანიამ სამუშაოები მიმდინარე 30 აგვისტომდე უნდა დაასრულოს.

ისტორიული წყაროების მიხედვით, ბათუმის საჯარო ბიბლიოთეკა 1902  წლის 13 ოქტომბერს გაიხსნა.

2021 წლის 31 დეკემბრის მდგომარეობით, ბიბლიოთეკის ფონდი 596 640 ერთეულია, მათ შორის 373 839 წიგნი, 84 ერთეული აუდიოწიგნი, 152 388 – ჟურნალი, 38 069 ერთეული და 3 902 კომპლექტი გაზეთია. საერთო მონაცემში შედის, ასევე, ფოტომასალა, რუკები, პლაკატები, კალენდარი და  სხვა.