ბათუმში, 26 მაისის ქუჩაზე, შპს „როიალ ბილდინგი“ ათსართულიანი მრავალბინიანი სახლის აშენებას გეგმავს. კომპანიას ახალი პროექტი #28-30-ში არსებული ძველი სახლების ათვისების ხარჯზე აქვს დაგეგმილი. კომპანია აქ მცხოვრებ მესაკუთრეებს უკვე მოელაპარაკა და რამდენიმე ფართობი მომავალში სამშენებლო მომსახურების გაწევის პირობით დაირეგისტრირა კიდეც.
კომპანიის დირექტორის ინფორმაციით, ამ ერთსართულიანი სახლისა და გვერდით მდებარე ორსართულიანი სახლის გარდა, კომპანიას გორგილაძის ქუჩამდე სურს ახალი სახლისთვის პერიმეტრის გასუფთავება
ტერიტორია ძეგლის დაცვის ზონაშია. მიუხედავად ამისა, კომპანიას კულტურული მემკვიდრეობის დაცვის სააგენტოსთვის ჯერ არ მიუმართავს. შესაბამისად, ჯერ არც მერიისგან აქვს ნებართვა.
„როიალ ბილდინგის“ დირექტორის, ნუკრი ბერიძის ინფორმაციით, კომპანია ამ პროექტის განხორციელებას არასთანადო-არასტანდარტული საცხოვრებლის ათვისების პროგრამის ფარგლებში გეგმავს და შესაბამისი მოლაპარაკებები აქვს მთავრობასთან.
გარდა ამისა, კომპანიას არც აქ მცხოვრებთა სრული თანხმობა მოუპოვებია ჯერჯერობით: „ორი ოჯახი ძალიან ბევრს ითხოვს, ამიტომ ჯერ ნებართვებამდე ვერ მივედით“, – გვითხრა კომპანიის დირექტორმა.
