ეროვნული გამოცდების შედეგების გამოქვეყნება აგვისტოდან დაიწყება


ერთიანი ეროვნული გამოცდები დღეს, 24 ივლისს, დასრულდა. გამოცდებზე 41 ათასი აბიტურიენტი იყო დარეგისტრირებული. გამოცდების ცენტრის ინფორმაციით, ეროვნულ გამოცდებზე დარეგისტრირებულთაგან 95% გამოცხადდა. ერთი აბიტურიენტი მოიხსნა გამოცდებიდან მობილური ტელეფონის შეტანის გამო, ორი კი – იმის გამო, რომ მათ ნაცვლად სხვა ცდილობდა გამოცდაზე გასვლას. იყო დამხმარე რესურსის გამოყენების ერთი მცდელობაც.

გამოცდების ეროვნული ცენტრის ხელმძღვანელი, სოფიო გორგოძე დღეს, 24 ივლისს, ბათუმში იმყოფებოდა, სადაც მან გამოცდები შეაჯამა.

გორგოძის თქმით, წელსაც დაახლოებით ის მიმართულებებია პოპულარული, რაც წინა წლებში ფიქსირდებოდა. „ესაა სამედიცინო, სამართალი, მენეჯმენტი, მართვა და ა.შ. რომელ მიმართულებაზეა ყველაზე დიდი ან ნაკლები კონკურენცია, ამ ეტაპზე ამას თვალს არ ვადევნებთ, რადგან აბიტურიენტებს ჯერ კიდევ შეუძლიათ ცვლილებების შეტანა, ასევე ქულების გამოცხადების შემდეგაც შეუძლიათ არჩევანი შეცვალონ“, – ამბობს გორგოძე.

მისი თქმით, ქულების გამოქვეყნება აგვისტოს პირველივე რიცხვებიდან დაიწყება. პირველად ზოგადი უნარების გამოცდის შედეგები დაიდება.

გორგოძის თქმით, 2019 წლის გამოცდებზე შემცირებული იყო დაგვიანების შემთხვევები და აბიტურიენტები უფრო მობილიზებული იყვნენ.

11 ქალაქში 23 საგამოცდო ცენტრი იყო გახსნილი.

2020 წელს ეროვნული გამოცდები სხვა სტანდარტით ჩატარდება. აბიტურიენტები აღარ ჩააბარებენ ზოგადი უნარების გამოცდას. სავალდებულო იქნება მხოლოდ სამი საგანი – ქართული ენა და ლიტერატურა, უცხო ენა და ისტორია. მათემატიკა იმის მიხედვით დაემატება, თუ რომელ მიმართულებას აირჩევს აბიტურიენტი, ჰუმანიტარულს თუ ტექნიკურს.

ცვლილებები იქნება სამედიცინო ფაკულტეტზე ჩაბარების შემთხვევაში, ამის შესახებ განათლების სამინისტრო დებულების ოფიციალურად დამტკიცების შემდეგ ისაუბრებს.

ეროვნული გამოცდების პარალელურად მიმდინარეობდა სამაგისტრო და მასწავლებლის კომპეტენციის დამადასტურებელი გამოცდებიც, რომელიც ასევე დღეს დასრულდა.

სამაგისტრო გამოცდაზე 12 ათასი ადამიანი დარეგისტრირდა, მასწავლებლის საგნობრივ გამოცდაზე კი  – 31 ათასი პედაგოგი, აქედან 10 ათასი მასწავლებლის პროფესიაში შესვლის მსურველია.

მასწავლებლის გამოცდის შედეგების გამოქვეყნებაც აგვისტოს შუა რიცხვებიდან დაიწყება.

მთავარი ფოტო: შეფასებისა და გამოცდების ეროვნული ცენტრი/2019 წლის ეროვნული გამოცდები

____

ამავე თემაზე:

2020 წლის ეროვნულ გამოცდებზე გამსვლელ ქულას უნივერსიტეტები ვერ დაადგენენ – გორგოძე

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com