„რუსთავი 2“-ის ნიუსრუმში პაატა სალია ჟურნალისტებს ხვდება, ჟურნალისტმა ნანუკა ჟორჟოლიანმა მას უთხრა, რომ ახლა მათთვის მთავარი გარანტიებია.
„თქვენ თუ მოიტანთ ორწლიან კონტრაქტებს იმ ცნობილ სახეებზე, რომლებიც ქმნიან ივანიშვილისთვის არასასურველ კონტენტს, თუ მოიტანთ ასეთ 10 კონტრაქტს, მაშინ მე პირადად თანახმა ვარ,“ – მიმართა „რუსთავი 2“-ის ახალ დირექტორს ნანუკა ჟორჟოლიანმა.
პაატა სალიამ მას უთხრა, რომ კონტრაქტების მომზადებას დრო სჭირდება. მან ასევე აღნიშნა, რომ ქიბარ ხალვაშს მხოლოდ ნიკა გვარამიასთან ვერ წარმოუდგენია თანამშრომლობა. „სხვა დანარჩენთან მას პრეტენზია არ გამოუთქვამს,“ – დასძინა პაატა სალიამ.
პაატა სალიას გადაცემა „აქცენტების“ წამყვანმა, ეკა კვესიტაძემ ჰკითხა, ახსოვს თუ არა სხვა შემთხვევა, როცა სტრასბურგის სასამართლოს გადაწყვეტილება ერთ დღეში აღსრულდა. პაატა სალიამ განმარტა, რომ სტრასბურგის სასამართლოს ამ შემთხვევაში შეჩერების მექანიზმი ჰქონდა გამოყენებული.
„ეს კინო ქიბარ ხალვაშის შესრულებით ჩვენ უკვე ნანახი გვაქვს…“ – უთხრა „რუსთავი 2“-ის ახალ დირექტორს ნოდარ მელაძემ.
„ასე რომ, არა მგონია, აქ თქვენ ვინმე სიტყვაზე გენდოთ“, – აღნიშნა ნანუკა ჟორჟოლიანმა.
———————————————–
18 ივლისს გამოქვეყნებულ გადაწყვეტილებაში ადამიანის უფლებათა ევროპულმა სასამართლომ „რუსთავი 2“-ის საქმეზე ადამიანის უფლებათა ევროპული კონვენციის არც ერთი მუხლის დარღვევა არ დაადგინა.
ამ გადაწყვეტილებით სტრასბურგის სასამართლომ თქვა, რომ კანონიერია საქართველოს სამი ინსტანციის სასამართლოს გადაწყვეტილება და „რუსთავი 2“ ქიბარ ხალვაშს ეკუთვნის. „რუსთავი 2“-ს შეუძლია, საქმე სტრასბურგის სასამართლოს დიდ პალატაში გაასაჩივროს.
