„ერთიანი ნაციონალური მოძრაობის“ განცხადებით, შეკვეთილში ივანიშვილის რეზიდენციასთან მოშიმშილეებს კარავი დაუნგრიეს. ამ წუთებში რეზიდენციის წინ საპატრულო პოლიციაა მობილიზებული.
ადგილიდან აქციის მონაწილე, მინდია ადაძე ვიდეოს ავრცელებს, სადაც ერთ-ერთი მოშიმშილე ამბობს, რომ გაურკვეველმა პირებმა მოშიმშილეების კარვები დაარბიეს.
„კარვები მიწასთან გაასწორეს, პოლიცია აქ იდგა მაგრამ რეაგირება აქ ჰქონია. ხელი არ შეუშალეს, უბრალოდ შუაში იდგნენ, რომ ჩხუბი არ მომხდარიყო. ბანერებიც კი გაიტაცეს“ – ამბობს აქციის მონაწილე დათო შავაძე. მისი თქმით, ზონდერებმა კარავში მყოფ ერთ პირს ხელიც დაარტყეს. კარავში იმ დროისთვის ხუთი ადამიანი იმყოფებოდა, აქედან ორი შიმშილობდა.
მოშიმშილეების დარბეული კარავი ივანიშვილის რეზიდენციის წინ შეკვეთილში
ადგილზე მყოფი პირები ამბობენ, რომ ჩანიშნული აქვთ იმ ავტომანქანების ნომრები, სადაც ის ადამიანები ჩასხდნენ, ვინც კარვები დაშალა.
შეკვეთილში მოშიმშილეები შს მინისტრის, გიორგი გახარიას გადადგომას მოითხოვენ და ასევე აცხადებენ, რომ საქართველოში უნდა დასრულდეს ოლიგარქიული რეჟიმი. ივანიშვილის რეზიდენციასთან შეკვეთილში დღესაც, საღამოს 19:00 საათისთვის დაგეგმილია საპროტესტო აქცია. აქციის მონაწილეები სოლიდარობას უცხადებენ თბილისში ანტისაოკუპაციო გამოსვლებს და აპროტესტებენ 20 ივნისს საპროტესტო აქციის დარბევას.
შეკვეთილში მე-16 დღეა შიმშილობენ.
ამავე თემაზე:
შეკვეთილში ივანიშვილის რეზიდენციასთან მოშიმშილე ერთი პირი კლინიკაში გადაიყვანეს
