ბათუმი,მთავარი,სიახლეები

ჭოროხი-სარფის ახალი გზის დეტალური პროექტირება აგვისტოში დაიწყება – გზების დეპარტამენტი

05.07.2019 • 4861
ჭოროხი-სარფის ახალი გზის დეტალური პროექტირება აგვისტოში დაიწყება – გზების დეპარტამენტი

ჭოროხი-სარფის ახალი ავტომაგისტრალის დეტალური პროექტირება 2019 წლის აგვისტოში დაიწყება და ამავე წლის ბოლოს დასრულდება – გვითხრეს ამჯერად საქართველოს საავტომობილო გზების დეპარტამენტში. სამი თვის წინ კი, დეპარტამენტში აცხადებდნენ, რომ გრძელდებოდა პროექტის ტექნიკურ-ეკონომიკური დასაბუთება და დეტალური პროექტირება მაისის თვის ბოლოს დაიწყებოდა. რატომ გაჭიანურდა დეტალური პროექტირების დაწყება, კომენტარი ვერ მივიღეთ. დეპარტამენტში ვერც იმის გარანტიას იძლევიან, დასრულდება თუ არა ამ გზის პროექტირება 2020 წლამდე.

ჭოროხი-სარფის ახალი გზის პროექტთან დაკავშირებით „ამ დროისთვის მიმდინარეობს ტექნიკურ-ეკონომიკური დასაბუთების მომზადება“, – გვითხრეს დეპარტამენტში.

დეტალური პროექტირების დროს უნდა დაზუსტდეს კონკრეტულად სად გაივლის ახალი გზა მდინარე ჭოროხიდან სარფამდე [საქართველო-თურქეთის სახელმწიფო საზღვრამდე] მონაკვეთში. ამასთან, დაზუსტებული არ არის, ეს გზა ჭოროხთან რა მონაკვეთით დაუკავშირდება ბათუმის შემოვლით გზას, რომელიც  მახინჯაურის გვირაბიდან ფრიდონ ხალვაშის გამზირის მიმდებარე ტერიტორიამდე შენდება.

ჭოროხი-სარფის მონაკვეთში ახალი გზის მშენებლობას, სავარაუდოდ, აზიის განვითარების ბანკი დააფინანსებს, რაც აღნიშნულია კიდეც ევროკომისიის მიერ გამოქვეყნებულ გეგმაში. საავტომობილო გზების დეპარტამენტის პროექტების ჩამონათვალშიც დონორად აზიის განვითარების ბანკია მითითებული.

საქართველოს საავტომობილო გზების დეპარტამენტის თავდაპირველი გათვლებით, ჭოროხი-სარფის გზის მშენებლობის სავარაუდო ღირებულება თავიდან 100 მილიონი აშშ დოლარით იყო განსაზღვრული, პროექტირება 2017 წლის მაისამდე უნდა დასრულებულიყო; 2020 წლის გაზაფხულზე კი, გზის მშენებლობის დასრულებაც იგეგმებოდა.

იმის გამო, რომ ამ დრომდე უცნობია, თუ სად გაივლის კონკრეტულად ახალი გზა, ზოგიერთი კერძო მესაკუთრის თქმით, ბოლო რამდენიმე წელია, მათ ბათუმის მერიაში მშენებლობის ნებართვაზე უარს სწორედ დაგეგმილი გზის მშენებლობის გამო ეუბნებიან. ამ ადამიანების ნაკვეთები ბათუმში, ძირითადად, ივანე მესხის ქუჩაზე და მის მიმდებარედ [ბათუმის შემოვლითი გზის დაბოლოება მდინარე ჭოროხთან], ასევე, გონიო-კვარიათში მდებარეობს.

ამ თემაზე:

სად გაივლის გონიო-კვარიათი-სარფში ახალი გზა – დეპარტამენტის პასუხი

ჭოროხი-სარფის ახალი გზა აღმოსავლეთ-დასავლეთის ჩქაროსნული ავტომაგისტრალის შემადგენელი ნაწილი იქნება. ბათუმი[ჭოროხი]-სარფის გზა ბათუმის შემოვლით გზას შეუერთდება და „ამ პროექტით აჭარის ტერიტორიაზე ჩქაროსნული ავტომაგისტრალის მშენებლობა დასრულდება.“ – აცხადებენ გზების დეპარტამენტში. თავის მხრივ, ბათუმის შემოვლითი გზა ჩაქვი-მახინჯაურის გვირაბთან ქობულეთის შემოვლით გზას დაუკავშირდება.

 

მთავარი ფოტო: ბათუმი-სარფის ახალი გზის მიმართულების რამდენიმე ვერსია განიხილება / ახალი გზის მდებარეობის ვარიანტები კვარიათში / ფოტო: საავტომობილო გზების დეპარტამენტი.

გადაბეჭდვის წესი


ასევე: