ვინ არიან აჭარის ტელევიზიისა და რადიოს დირექტორობის ახალი კანდიდატები


დღეს დასრულდა საზოგადოებრივი მაუწყებლის აჭარის ტელევიზიისა და რადიოს დირექტორის კონკურსზე განცხადებების მიღება.

აჭარის საზოგადობრივი მაუწყებლის ინფორმაციით, კონკურსში 12 კანდიდატი მონაწილეობს:

ირმა ზოიძე, შოთა გურაბანიძე, დავით ჩხარტიშვილი, ფირუზ ბოლქვაძე, თინა ცისკარაძე, დავით დიასამიძე, გიორგი კოხრეიძე, ბაჩუკი ჩხეიძე, მერაბ წულუკიძე, ციალა ქათამიძე, შოთა ზოიძე და გიორგი წულაია.

აჭარის საზოგადოებრივი მაუწყებლის მრჩეველთა საბჭოში გვითხრეს, რომ კანდიდატთა სია შეიძლება დაკორექტირდეს, რადგან ელექტრონულ ფოსტაზე რამდენიმე კონკურსანტის ინფორმაცია მივიდა დაგვიანებით და ერთ საათში ზუსტად ეცოდინებათ კანდიდატების ვინაობა.

საზოგადოებრივი მაუწყებლის აჭარის ტელევიზიისა და რადიოს დირექტორის კონკურსი უკვე მეორედ იმართება.  პირველ ჯერზე კონკურსი 31 მაისს გაიმართა და დირექტორის პოსტზე სულ რვა კანდიდატი განიხილებოდა, აქედან მეორე ტურში ოთხი კანდიდატი გადავიდა, თუმცა ვერც ერთმა კანდიდატმა ვერ შესძლო კონკურსში გასამარჯვებლად საჭირო რაოდენობის ხმების მოგროვება და კონკურსი ხელახლა გამოცხადდა.

მეორე ჯერზე კონკურში მონაწილეობას იღებს ყველა კანდიდატი, რომლებიც პირველ ჯერზე მონაწილეობდნენ კონკურსში, გარდა ნათია ზოიძისა და თორნიკე მჟავანაძისა.

ნათია ზოიძემ, რომელიც ამჟამად საზოგადოებრივი მაუწყებლის აჭარის ტელევიზიისა და რადიოს დირექტორის მოვალეობის შემსრულებელია, პირველი კონკურსის შემდეგ განაცხადა, რომ მრჩეველთა საბჭო არის პოლიტიკურად მოტივირებული და ამ პროცესს არაფერი აქვს საერთო იდეებთან, ღირებულებებთან და არ ეფუძნება პრობლემების მქონე თანამშრომელთა მიმართ სოლიდარობის  განცდას.

საზოგადოებრივი მაუწყებლის აჭარის ტელევიზიისა და რადიოს დირექტორის ადგილი 19 აპრილიდანაა ვაკანტური, როცა მრჩეველთა საბჭომ ნათია კაპანაძე თანამდებობიდან გადააყენა.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com