პროკურატურა ბათუმის მერიის საქალაქო ინფრასტრუქტურისა და კეთილმოწყობის სამმართველოს ხელმძღვანელის მოადგილეს, ჯემალ დიასამიძესა და შპს „კრისტალის“ ერთ-ერთ დამფუძნებელს, მუხრან ელიაძეს შორის მომხდარ ინციდენტს სწავლობს. 27 ივნისს, სასამართლოსთან ჩხუბის შემდეგ მუხრან ელიაძემ „ბათუმელებს“ უთხრა, რომ მერიის თანამშრომელი მას 10 ათას ლარს და ძვირადღირებულ ავტომანქანას სძალავდა. პროკურატურაში ამბობენ, რომ დანაშაულის ნიშნების გამოკვეთის შემთხვევაში, შესაძლოა დაიწყოს გამოძიებაც.
„ბათუმელების“ ინფორმაციით, მხარეები პროკურატურამ გუშინ, 28 ივნისს გამოკითხა.
27 ივნისს, 15:00 საათზე, ბათუმის საქალაქო სასამართლოს წინ, ბათუმის მერიის საქალაქო ინფრასტრუქტურისა და კეთილმოწყობის სამმართველოს უფროსის მოადგილე ჯემალ დიასამიძე და ერთ-ერთი მშენებელი, მუხრან ელიაძე ერთმანეთს ჯერ სიტყვიერად, შემდეგ კი ფიზიკურად დაუპირისპირდნენ.
ფაქტს „ბათუმელები“ ადგილზე შეესწრო, თუმცა მერიის თანამშრომელი ჯემალ დიასამიძე ინციდენტს უარყოფს.
მუხრან ელიაძის კომპანია მერიის ერთ-ერთ ტენდერის ფარგლებში გონიო-კვარიათში ასფალტს აგებდა. მერიამ ამ ტენდერის ფარგლებში გაფორმებული ხელშეკრულება ცალმხრივად შეწყვიტა და არც შესრულებული სამუშაოების თანხა გადაიხადა სრულად. ამ ტენდერთან დაკავშირებით მხარემ სასამართლოში იჩივლა.
„ბათუმელებისთვის“ მიცემულ ინტერვიუში მუხრან ელიაძემ განაცხადა, რომ მერიის თანამშრომელი ქრთამის სახით ძვირადღირებულ ავტომანქანას და 10 000 ლარს სძალავდა.
ამავე თემაზე:
ჩხუბი ქუჩაში – მშენებელი ამბობს, რომ მერიის თანამშრომელი მანქანას და 10 000 ლარს სთხოვდა
