ზუგდიდში, საკუთარ სახლში სახელოსნო აქვს მოწყობილი და ხეზე მუშაობს – ზაფხულობით სუფთა ჰაერზე კვეთს ხეზე. უამრავი შეკვეთა აქვს და ამბობს, რომ გარდა დეკორატიული ნაკეთობებისა, პრაქტიკული საჭიროების ნივთებსაც ამზადებს: ავეჯს, თაროებს და ა.შ. თუმცა ყველაზე ძალიან ხატების კვეთა მოსწონს: დეტალები უამრავ ორნამენტსა და ხაზს ითხოვს, რასაც ბევრი შრომა და ფანტაზია სჭირდება – სწორედ ეს მოსწონს.
დავით სოსელიას თქმით, მას 72 ეკლესიის აღსავლის კარზე, დიდ ჯვრებსა და ხატებზე უმუშავია. გვეუბნება, რომ ზუგდიდში ,,ხუროთმოძღვარსაც“ კი ეძახიან.
53 წლის ყოფილი პატიმარი შვებას ხეზე კვეთაში პოულობს, ეს საქმე მისთვის შემოსავლის მთავარი და საიმედო წყაროა.
,,პირველად ხის და ვერცხლის ნაკეთობის დამზადების პროცესი ვნახე და გავოგნდი, ისე მომეწონა შედეგი, ხეზე კვეთა მას შემდეგ ვისწავლე. ძალიან მომწონს და მსიამოვნებს ნამუშევარზე ფიქრი, ორნამენტების გამოყვანა, ბოლოს კი – შედეგის ნახვა. მე რომ მიყვარს ეს საქმე, ალბათ მაგიტომაც მოსწონს ყველას, რასაც და როგორც ვაკეთებ, ხეზე კვეთის საუკეთესო ოსტატი ვარ! ასე ვფიქრობ და რატომ დავმალო. მყავს და, მეუღლე და 13 წლის შვილი, ოჯახის ექვსი წევრიც რომ გყავდეს, ამ საქმით ყველას მიხედავ“, – ამბობს 53 წლის დავით სოსელია.
ხეზე კვეთა საპატიმროში ისწავლა, როცა ხელობას ალღო აუღო და დაოსტატდა, მოსწავლეებიც აიყვანა ციხეში და საქმე სხვებსაც ასწავლა.
დავითს ხეზე კვეთისთვის აუცილებელი ხელსაწყო – დანადგარების შეძენაში ყოფილი პატიმრების გაძლიერების პროექტი დაეხმარა, რისთვისაც მან სამეგრელოში მოქმედ ფონდ ,,თანაზიარს“ მიმართა. ფონდი ,,დემოკრატიის ინსტიტუტის“ პარტნიორი ორგანიზაციაა, „დემოკრატიის ინსტიტუტი“ კი ოთხ პარტნიორ ორგანიზაციასთან ერთად ახორციელებს ყოფილი პატიმრების სარეაბილიტაციო პროექტს აჭარაში, იმერეთში, გურიასა და სამეგრელო – ზემო სვანეთში.
პროექტი ევროკავშირის ფინანსური მხარდაჭერით ხორციელდება.
მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“ ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.
