მერიის ყოფილი თანამშრომელი ამბობს, რომ ფეისბუქპოსტის გამო დაჭრეს


„მანქანით ევროპის მოედნიდან გამიყვანეს. კახა მიქელაძემ მითხრა, რომ სპეციალურ ადგილზე მივყავდი,” – აცხადებს ბათუმის მერიის ყოფილი თანამშრომელი, ალექსანდრე თევზაძე. იგი 21 ივნისს დაჭრეს. ამ საქმეზე ჯგუფური ხულიგნობის მუხლით ორი პირია დაკავებული, მათ შორის, აჭარის უმაღლესი საბჭოს ყოფილი წევრი, კახა მიქელაძე.

ალექსანდრე თევზაძე ყვება, რომ კონფლიქტი „ფეისბუქში“ დაიწყო, სადაც ალეკოს თქმით, კახა მიქელაძემ საპროტესტო აქციებზე გამოსულ ახალგაზრდებს თავისი პოსტით შეურაცხყოფა მიაყენა.

“აქციაზე ვიყავი, როცა კახასგან მივიღე სატელეფონო შეტყობინება, რომ საუბარი სურდა… მანქანაში მითხრა, რომ სპეციალურ ადგილზე მივყავდი, რაც არც ვიცოდი რა იყო, გავაპროტესტე და ვაიძულე, მანქანა კაფე “კონტესთან” გაეჩერებინათ. ამ დროს მძღოლმა გამოიყენა ხანჯალი და თავის, ასევე ხელის არეში მომაყენა დაზიანებები. მძღოლის ვინაობა არ ვიცი. კახა მიქელაძე ისე მეხებოდა, ფიზიკურად…”- ამბობს ალექსანდრე თევზაძე.

მერიის ყოფილი თანამშრომლის თქმით, ის ქუჩაში დატოვეს და პირველადი დახმარება კაფეს თანამშრომლებმა გაუწიეს. შემდეგ დაშავებული რეფერალურ ჰოსპიტალში გადაუყვანიათ.

“არ ვიცი, რა უნდოდათ, არ უთქვამთ… შესაძლოა, ეს უკავშირდებოდეს ჩემს აქტივობას ქიმიური ტერმინალის წინააღმდეგ,”- დასძენს ალეკო თევზაძე.

შინაგან საქმეთა სამინისტროს ინფორმაციით, სამართალდამცველებმა ამ საქმეზე გუშინ, 24 ივნისს, 2 პირი დააკავეს სისხლის სამართლის კოდექსის 239-ე მუხლის მე-2 და მე-3 ნაწილების შესაბამისად, რაც ხულიგნობის ჯგუფურად ჩადენას გულისხმობს.

ნეტგაზეთის მასალების სხვა გამოცემებში გადაბეჭდვის წესი
ავტორი