ბათუმის მერიის მოქმედი და ყოფილი 7 მაღალჩინოსნის საქმის განხილვა ბათუმის საქალაქო სასამართლოში დღეს, პირველ ივნისს დაიწყო. ბრალდებულებს აღკვეთ ღონისძიებას მოსამართლე ლევან გელოვანი შეუფარდებს. სასამართლო პროცესი რამდენიმე წუთის წინ დაიწყო.
ბრალდებულებს შორის არიან ბათუმის ყოფილი მერი გია ერმაკოვი, აჭარის განათლების მინისტრის მოადგილე ბაგრატ მანველიძე, აჭარის ფინანსთა და ეკონომიკის მინისტრის მოადგილე, არჩილ ვანაძე.
ბრალდებულები წარდგენილ ბრალს არ აღიარებენ. როგორც ადვოკატებმა პროცესის დაწყებამდე გვითხრეს, ისინი გირაოს საფუძველზე მოითხოვენ დაკავებულების გათავისუფლებას, ვიდრე სასამართლო საბოლოო გადაწყვეტილებას მიიღებს.
აღკვეთის ღონისძიების შეფარდების პროცესს ესწრებიან პოლიტიკოსებიც, მათ შორის, ბათუმის მოქმედი მერი – ლაშა კომახიძე.
დაკავებულებს ბრალის დადასტურების შემთხვევაში 7-დან 11-წლამდე პატიმრობა ემუქრებათ.
_____
მერიის მაღალჩინოსნები „იაფი სახლის“ პროექტის საქმეზე 30 მაისს დააკავეს. ამ პროექტის განხორციელება ბათუმის მერიამ 2016 წელს დაიწყო. პროკურატურის ინფორმაციით, იაფი სახლის“ ტენდერის შედეგად 1 მილიონ 370 ათასი ლარი გაიფლანგა ბიუჯეტიდან. ბრალდებულებს გამოძიება სისხლის სამართლის კოდექსის 182 მუხლის მეორე და მესამე ნაწილების, ასევე 332-ე მუხლის პირველი ნაწილის დარღვევას გულისხმობს. 182-ე მუხლი მითვისებას, ან გაფლანგვას გულისხმობს. პროკურატურა მაღალჩინოსნებს „მძიმე შედეგის“ დადგომას ედავება, რაც 7-დან 11 წლამდე თავისუფლების აღკვეთას ითვალისწინებს. 332-ე მუხლი კი სამსახურებრივი უფლებამოსილების ბოროტად გამოყენებისთვის ითვალისწინებს თავისუფლების აღკვეთა სამი წლის ვადით.
დაკავებულებს შორის არიან: ბათუმის ყოფილი მერი გიორგი ერმაკოვი, აჭარის განათლებისა და კულტურის მინისტრის მოადგილე ბაგრატ მანველიძე [ის სადავო ტენდერის ჩატარების დროს ბათუმის ვიცე-მერი იყო და სატენდერო კომისიის თავმჯდომარე]; აჭარის ფინანსთა და ეკონომიკის მინისტრის მოადგილე არჩილ ვანაძე [ბათუმის მერიის საფინანსო სამსახურს ხელმძღვანელობდა], ბათუმის ვიცე-მერი თენგიზ პეტრიძე, მერიის მუნიციპალური სერვისების, ქონებისა მართის სამსახურის უფროსი ეგარსლან ლომაძე, საქალაქო ინფრასტრუქტირისა და კეთილმოწყობის სამსახურის უფროსის მოადგილე ვლადიმერ ხინთიბიძე, მერიის შესყიდვის სამსახურის უფროსი ბექა ხალვაში.
