საცხოვრისის პროგრამა აჭარაში უკუმიგრირებული ეკომიგრანტებისთვის


აჭარის ჯანდაცვის მინისტრის, ზაალ მიქელაძის ინფორმაციით, უსაფრთხო საცხოვრისით უზრუნვეყოფის პროგრამა უკუმიგრირებული ოჯახებისთვისაც მისაწვდომი იქნება, განსაკუთრებით ეს შეეხება სამეგრელოდან უკუმიგრირებულებს. პროგრამა ბენეფიციარებს საცხოვრებელი სახლების თანამონაწილეობით შეძენას სთავაზობს. პროგრამაში ცვლილებას დღეს აჭარის მთავრობის სხდომაზე მხარი დაუჭირეს.

მინისტრ ზაალ მიქელაძის განმარტებით, ცვლილება განსაკუთრებით იმ ეკომიგრანტებს შეეხება, რომლებიც 2000 წლამდე იყვნენ მიგრირებულები სხვადასხვა რეგიონებში:

„მათგან ბევრი ოჯახი უკუმიგრირდა აჭარაში. ისინი ვერ სარგებლობდნენ ჩვენი ე.წ. 25 000-ლარიანი პროგრამით, რადგან არსებობდა ჩანაწერი, რომ ისინი უკვე იყვნენ დაკმაყოფილებულები. თუმცა ჩვენ ახლა მათ ვაძლევთ შანსს, იმ რეგიონებიდან წარმოდგენილი ცნობის საფუძველზე, რომ ისინი რეალურად იქ აღარ ცხოვრბენ და არ ფლობენ საკუთრებას“.

მინისტრის ინფორმაციით,  სამინიტროს პროგრამაში მონაწილეობის შესაძლებლობის თხოვნით ასეთმა 12-მა ოჯახმა მიმართა.

ეკომიგრანტი ოჯახების საცხოვრებლით უზრუნველყოფის პროგრამას აჭარის ჯანმრთელობისა და სოციალური დაცვის სამინისტრო  2016 წლიდან ახორცილებს. მინისტრის ინფორმაციით, ამ დრომდე პროგრამის ფარგლებში 300-მდე ოჯახმა შეისყიდა საცხოვრბელი სახლი.

პროგრამით გათვალისწინებულია ბენეფიციარების დაფინანსება, მის მიერ შერჩეული საცხოვრებელი ფართობის შესყიდვისთვის, არაუმეტეს 25 000 ლარისა, ღირებულების დარჩენილ ნაწილს ოჯახი თვითონ ამატებს, ან ამ ფასად გასაყიდ ფართობს პოულობს.

პროგრამით სარგებლობენ ეკომიგრანტები, რომლებსაც მინიჭებული აქვთ შესაბამისი ქულა.

პროგრამის ფარგლებში საცხოვრებელი ფართობის ღირებულებას ანაზღაურებენ უნაღდო ანგარიშსწორებით, გამყიდველის მიერ წარმოდგენილ საბანკო ანგარიშზე, უძრავი ქონების ნასყიდობის თაობაზე, ხელშეკრულებაში ასახული ქონების ღირებულების შესაბამისად.

 

ნეტგაზეთის მასალების სხვა გამოცემებში გადაბეჭდვის წესი
ავტორი