ენმ-ის წევრი: „მზად ვარ, თავდებად დავუდგე გუშინ დაკავებულ სამ ადამიანს“


„მზად ვარ, თავდებად დავუდგე გუშინ დაკავებულ ადამიანებს,” – განაცხადა რიგგარეშე სხდომის დაწყებამდე მირდატ ქამადაძემ, ფრაქცია „ნაციონალური მოძრაობის” ხელმძღვანელმა.

დღეს, 31 მაისს, საკრებულოს წევრები იურიდიული კომისიის ასარჩევად შეიკრიბნენ. ეს პოზიცია ვაკანტური მას შემდეგ გახდა, როცა ომარ მახარაძე მისმა სტუდენტმა სექსუალურ შევიწროებაში დაადანაშაულა. გამოძიებამ ომარ მახარაძე გუშინ გამოკითხა. ის საკრებულოს რიგით წევრად რჩება.

ვიდრე საკრებულო წილისყრის პროცედურებს წამოიწყებდა, თავდაპირველად საკრებულოს მირდატ ქამადაძემ მიმართა:

„ფუკასავით აგვაცალეს ეს ადამიანები… ერთხელ მაინც რომ დაგვებარებინა ეს ადამიანები სხდომებზე, რომ მოგვეთხოვა პასუხი, ეს არ მოხდებოდა. „ქართულმა ოცნებამ“ შექმნა ეს მახინჯი სისტემა… პასუხისმგებლობა გეკისრებათ თქვენ, საკრებულოს წევრებს. თქვენ ვერ გაბედეთ დაგეძახათ მერისთვის… მე პირადად ვუდგები თავდებად ამ ადამიანებს, შემდეგ დაველოდოთ სასამართლოს გადაწყვეტილებას,“ – აღნიშნა მირდატ ქამადაძემ, ენმ-ის წარმომადგენელმა საკრებულოში.

მოგვიანებით მან „ბათუმელებს“ უთხრა, რომ თავდებად შეუძლია დაუდგეს არა შვიდივე პირს, ვინც გუშინ დააკავეს, არამედ მათ, ვინც მერიაში სადავო ტენდერის დროს „რიგითი საჯარო მოხელეები იყვნენ“. კონკრეტულად კი, მირდატ ქამადაძე მზადაა თავდებად დაუდგეს ეგარსლან ლომაძეს, არჩილ ვანაძესა და ბექა ხალვაშს.

„ცოტა უხერხული ხომ არ არის საუბარი ვინმეს დამნაშავეობაზე, ვიდრე გამოძიება არ დასრულდება… მე დარწმუნებული ვარ, გამოძიება მიიღებს სწორ და ობიექტურ გადაწყვეტილებას. წინასწარ ამაზე საუბარი არ მიმაჩნია მიზანშეწონილად,“ – მიმართა ოპოზიციას სულიკო თებიძემ, საკრებულოს თავმჯდომარემ.

მირდატ ქამადაძემ აქვე დასძინა, რომ საკრებულომ და მათ შორის საკრებულოს თავმჯდომარემ პოლიტიკური პასუხისმგებლობა უნდა აიღოს ამ პროცესზე.

განცხადებები გუშინდელ დაკავებაზე საკრებულოს სხვა წევრებმაც განაცხადეს. მათ ობიექტური გამოძიების იმედი გამოთქვეს.

30 მაისს პროკურატურამ ბათუმის მერიის მოქმედი და ყოფილი 7 მაღალჩინოსანი ერთდროულად დააკავა. აჭარის მთავარმა პროკურორმა, ნათია სონღულაშვილმა ბრიფინგი გამართა და თქვა, რომ მაღალჩინოსნების დაკავება 2015 წელს ჩატარებულ იმ ტენდერს უკავშირდება, რომლითაც ბათუმში „იაფი სახლი“ უნდა აშენებულიყო.

 

ნეტგაზეთის მასალების სხვა გამოცემებში გადაბეჭდვის წესი
ავტორი