მთავარი,სიახლეები

ჩვენი ხელისუფლების შეურიგებელი ბრძოლა კორუფციასთან გრძელდება – თორნიკე რიჟვაძე 

30.05.2019 • 1769
ჩვენი ხელისუფლების შეურიგებელი ბრძოლა კორუფციასთან გრძელდება – თორნიკე რიჟვაძე 

აჭარის მთავრობის თავმჯდომარემ, თორნიკე რიჟვაძემ, ბათუმის მერიის ყოფილი და მოქმედი მაღალჩინოსნების დაკავებასთან დაკავშირებით პირველი კომენტარი გააკეთა.

„რამდენიმე წლის წინ მომხდარ ფაქტთან დაკავშირებით სისხლის სამართლის საქმეზე დაკავებულია რამდენიმე მოქმედი მაღალჩინოსანი. კიდევ ერთხელ მინდა გავიმეორო, რომ თანამდებობა ჩვენი ხელისუფლების პირობებში არ არის გარანტია ან პრივილეგია, რომ ვინმემ ისარგებლოს პრივილეგიებით, თუმცა ამავე დროს ჩვენ უნდა დავიცვათ უდანაშაულობის პრეზუმფცია და დაველოდოთ გამოძიების შედეგებს ისე, რომ საფრთხე არ შეექმნას მართლმსაჯულების აღსრულებას.

ასევე მინდა განვმარტო, რომ ჩვენი ხელისუფლების შეურიგებელი ბრძოლა კორუფციასთან გრძელდება და ჩვენ ვიქნებით ყველასთან თანაბრად მომთხოვნი და კანონის წინაშე ყველა არის თანაბარი,“ – განაცხადა თორნიკე რიჟვაძემ.

კითხვაზე, ჰქონდა თუ არა რაიმე ტიპის თანამშრომლობა სამართალდამცავებთან, თორკინე რიჟვაძემ გაიმეორა, რომ ანტიკორუფციული პოლიტიკის ფარგლებში მთავრობა თანამშრომლობს  საგამოძიებო ორგანოებთან  და აუცილებელია უდანაშაულობის პრეზუმფციის დაცვა.

პროკურატურამ აჭარაში თანამდებობის 7 პირი დააკავა. დაკავებულებს შორის არიან: აჭარის განათლების მინისტრის მოვალეობის შემსრულებელი ბაგრატ მანველიძე და ბათუმის ვიცე-მერი თენგიზ პეტრიძე, ასევე ბათუმის ყოფილი მერი გიორგი ერმაკოვი.

„ბათუმელების“ ინფორმაციით, თანამდებობის პირები „იაფი სახლის“ პროექტთან დაკავშირებით დააკავეს.

ხელმისაწვდომი საცხოვრის პროექტს ბათუმის მერია ბოლო რამდენიმე წელია ახორციელებს. იაფი სახლის პროექტთან დაკავშირებით ბათუმის მერია კიდევ ერთ სკანდალში 2016 წელს გაეხვა.

გადაბეჭდვის წესი


ასევე: