მემცენარეობა და აგრობიზნესის შემცირებული წილი ქვეყნის ეკონომიკაში [ინფოგრაფიკა]

საქართველოს სტატისტიკის ეროვნულმა სამსახურმა, მემცენარეობის შესახებ გასული წლის წინასწარი მონაცემები გამოაქვეყნა. სტატისტიკიდან ჩანს, რომ ერთწლიანი კულტურების წარმოება 2017 წელთან შედარებით გაზრდილია, თუმცა დიაგრამიდან ჩანს, რომ ზრდის ტენდენცია წინა წლებს ნაკლებად მიემართება:

წინასწარი მონაცემებით, 2018 წელს ხორბლის წარმოებამ 106.2 ათასი ტონა შეადგინა, რაც 8.5 პროცენტით აღემატება წინა წლის შესაბამის მაჩვენებელს. ქერის წარმოება 33.3 პროცენტით გაიზარდა და 58.5 ათას ტონას მიაღწია. სიმინდის წარმოება 190.3 ათასი ტონით განისაზღვრა, რაც 33.5 %-ით აღემატება წინა წლის შესაბამის მაჩვენებელს.

კარტოფილის წარმოება 21.1 %-ით გაიზარდა და 218.1 ათასი ტონა შეადგინა. ამასთან, 2018 წლის განმავლობაში წარმოებულია 138.3 ათასი ტონა ბოსტნეული, რაც 9.8 პროცენტით აღემატება წინა წლის შესაბამის მონაცემებს. აქვე ჩანს რომ სიმინდის წარმოება 2018 წლის წინასწარი მონაცემებით, 2016 წელთან შედარებით, 53,4 ტონით, 2014 წელთან შედარებით კი – 101.3 ტონით არის შემცირებული.

წინასწარი მონაცემებით, 2018 წელს ერთწლიანი კულტურების ნათესმა ფართობმა 205.7 ათასი ჰექტარი შეადგინა, რაც წინა წლის შესაბამის მაჩვენებელს 6.6 %-ით ჩამორჩება.
მათ შორის საშემოდგომო მარცვლოვანი კულტურების ნათესი ფართობია 53.1 ათასი ჰექტარი, ხოლო საგაზაფხულო კულტურების ნათესმა ფართობმა 152.6 ათასი ჰექტარი შეადგინა.
ერთწლიანი კულტურების ნათეს ფართობში ყველაზე დიდი წილი სიმინდს უკავია, რომლის ნათესმა ფართობმა 72.4 ათასი ჰექტარი შეადგინა.

2018 წელს ქვეყანაში წარმოებულია 86.2 ათასი ტონა თესლოვანი ხილი, რაც 3.3-ჯერ აღემატება წინა წლის შესაბამის მაჩვენებელს. საანგარიშო პერიოდში წარმოებულია ასევე 46 ათასი ტონა კურკოვანი ხილი (წინა წელთან შედარებით 2.4 %-ით ნაკლები), 21.9 ათასი ტონა კაკლოვანი ხილი (12.2 %-ით ნაკლები), 15.5 ათასი ტონა სუბტროპიკული ხილი (19.3 %-ით მეტი), 67.4 ათასი ტონა ციტრუსი (15.8 %-ით მეტი).

2018 წელს წარმოებულია 261.8 ათასი ტონა ყურძენი, რაც 44.8 %-ით აღემატება წინა წლის შესაბამის მაჩვენებელს.

აღსანიშნავია, რომ სოფლის მეურნეობაში გარკვეული მიმართულებებით ზრდის ტენდენციის მიუხედავად, ბოლო რამდენიმე წელია კლებულობს აგრობიზნესის მთლიანი გამოშვების წილი ქვეყნის ეკონომიკაში:

აღსანიშნავია ასევე, რომ სახელმწიფო აუდიტის მიხედვით, საქართველოში აზიურმა ფაროსანამ განსაკუთრებით დააზიანა თხილის კულტურა. მოსავალი 2016 წელს − 16%-ით, ხოლო 2017 წელს 27%-ით შემცირდა. მწარმოებლებისა და ექსპორტიორებისთვის მიყენებულმა ზარალმა კი, მარტო 2016 წელს, 69 მილიონამდე აშშ დოლარი შეადგინა.

სახელმწიფო აუდიტის ანგარიშის მიხედვით, აზიურ ფაროსანასთან ბრძოლა სახელმწიფომ დაგვიანებით დაიწყო; გასულ წლებში გატარებული ღონისძიებები კი არაეფექტური აღმოჩნდა.

ამ თემაზე:

აზიური ფაროსანას წინააღმდეგ გატარებულ ღონისძიებებს აუდიტი არაეფექტურად აფასებს

ღონისძიებები, რითაც ნაკლები ფაროსანა გამოიზამთრებს – როგორ დავიცვათ ციტრუსი და თხილი