აჭარის განათლების, კულტურისა და სპორტის სამინისტროს მიერ გამოცხადებული ტენდერი იმ მიზეზით არ შედგა, რომ პრეტენდენტმა კომპანიამ დოკუმენტი ელექტრონული ხელმოწერის გარეშე ატვირთა სისტემაში. სამინისტროს სატენდერო კომისიამ ტენდერი ხელახლა გამოაცხადა.
საქმე ეხება ხულოს მუნიციპალიტეტის სოფელ ბეღლეთის საჯარო სკოლის მშენებლობაზე გამოცხადებულ ტენდერს. სკოლის ახალი შენობის ასაშენებლად 2 696 300 ლარია ბიუჯეტში გათვალისწინებული. ტენდერში მონაწილე კომპანია კი სკოლის აშენებას სამინისტროს 2 157 041 ლარად სთავაზობდა.
სატენდერო კომისიის ოქმის მიხედვით, „პრეტენდენტის მიერ [დამატებით] წარმოდგენილი დაზუსტებული ფასების ცხრილი შეესაბამება სატენდერო პირობებით გათვალისწინებულ მოთხოვნებს… პრეტენდენტის პერსონალის გამოცდილების შესახებ წარმოდგენილ ინფორმაციაზე კი, რომელსაც ხელს აწერს პროექტის ხელმძღვანელი, არ არის აღნიშნული ამ პირის ელექტრონული ხელმოწერა“, რის გამოც კომპანიას ტენდერში დისკვალიფიკაცია მისცეს.
2019 წლის 1 იანვრიდან, შემსყიდველი ორგანიზაციები და შესყიდვებში მონაწილეობის მსურველები/პრეტენდენტები/მიმწოდებლები „ელექტრონული დოკუმენტისა და ელექტრონული სანდო მომსახურების შესახებ“ საქართველოს კანონის მე-3 მუხლის მე-3 და მე-4 პუნქტების საფუძველზე ვალდებულები არიან, სახელმწიფო შესყიდვებში ერთიან ელექტრონულ სისტემაში ასატვირთ ელექტრონულ დოკუმენტებზე შეასრულონ კვალიფიციური ელექტრონული ხელმოწერა ან/და ეს დოკუმენტები დაამოწმონ კვალიფიციური ელექტრონული შტამპით.
კომისიის ოქმში ასევე აღნიშნულია, რომ „კომისია შეიკრიბოს ყველაზე დაბალი ფასის წინადადების მქონე მომდევნო პრეტენდენტის [ასეთის არსებობის შემთხვევაში] სატენდერო წინადადების განსახილველად“, თუმცა, როგორც შესყიდვების სისტემიდან ჩანს, ტენდერში სხვა არავინ მონაწილეობდა, ამიტომ ტენდერი დასრულდა უარყოფითი შედეგით.
დოკუმენტზე ელექტრონული ხელმოწერის არარსებობის გამო უარყოფითი შედეგით დასრულებული 2,6-მილიონიანი ტენდერი სამინისტრომ ხელახლა გამოაცხადა. სატენდერო თანხა და პირობები იგივეა. აქედან გამომდინარე, სკოლის მშენებლობის დაწყება იმ პერიოდით დაგვიანდება, რაც ახალი ტენდერის პროცედურებს – გამარჯვებულის გამოვლენას და მასთან ხელშეკრულების გაფორმებას დასჭირდება. სკოლა 2 წლის განმავლობაში უნდა აშენდეს.
ხელახლა გამოცხადებულ ტენდერში წინადადებების მიღება 2019 წლის 6 მარტს დაიწყება და 11 მარტს დასრულდება.
ამ თემაზე:
ხულოს სოფელ ბეღლეთში ახალი სკოლა აშენდება – 2,6-მილიონიანი ტენდერი
