Batumelebi | მერია „დაიცავი ძველი ბათუმის“ წევრებს პასუხობს მერია „დაიცავი ძველი ბათუმის“ წევრებს პასუხობს – Batumelebi
RU | GE  

მერია „დაიცავი ძველი ბათუმის“ წევრებს პასუხობს

საინიციატივო ჯგუფის – „დაიცავი ძველი ბათუმის“ მიერ დღეს, 14 თებერვალს, გამართული ბრიფინგის საპასუხოდ ბათუმის მერია განმარტავს, რომ ბათუმის პორტში ახალი ტერმინალის მშენებლობასთან დაკავშირებით, ამ ეტაპზე, მიმდინარეობს შესაბამისი დოკუმენტაციის შემუშავება. როგორც კი დასრულდება ეს  პროცესი, მერია გაავრცელებს ოფიციალურ განცხადებას.

რაც შეეხება ბათუმის ისტორიული განაშენიანების ზონის საზღვრებს, საქართველოს კულტურული მემკვიდრეობის დაცვის ეროვნულ სააგენტოში ხვალ, 15 თებერვალს, გაიმართება გაფართოებული მსჯელობა შესაბამისი დარგის ექსპერტების ჩართულობით, გადაწყვეტილებას ამ შეხვედრის შემდეგ მიიღებენ:

„ძველი ბათუმის იერსახის შენარჩუნების მიზნით, ბოლო ერთი წლის განმავლობაში არაერთი ნაბიჯი გადაიდგა, როგორც კულტურული მემკვიდრეობის ძეგლებთან, ასევე სხვა ფონურ შენობებთან მიმართებაში. რაც შეეხება წლების წინ შეთანხმებულ პროექტებს [პროექტის ეტაპების შეთანხმება], იმ შემთხვევებში, როცა მშენებლობის ნებართვის მიღების მიზნით მომართვა განხორციელდა მერიის მიერ ჩატარებული საკანონმდებლო ცვლილებების შემდეგ [ძველი ბათუმის ტერიტორიაზე 12 მეტრიანი შეზღუდვა], მშენებლობაზე ნებართვის გაცემის გადაწყვეტილება სასამართლომ მიიღო. შესაბამისად, მერიას ნებართვის გაცემაზე უარის თქმის არანაირი ბერკეტი არ გააჩნია“, – ნათქვამია მერიის პრესსამსახურის მიერ მოწოდებულ განცხადებაში.

„დაიცავი ძველი ბათუმის“ წევრებმა დღეს გამართულ ბრიფინგზე საპროტესტო აქცია დააანონსეს. აქცია, რომელიც საინიციატივო ჯგუფის წევრების თქმით, „შენებისა და ინვესტიციების მოზიდვის სახელით ბათუმის ნგრევას და ჩაბეტონებას“ გააპროტესტებს, ბათუმში კვირას, 17 თებერვალს,  14:00 საათზე, ვარდების სკვერში [გორგილაძის ქუჩა] გაიმართება.

მოძრაობის წევრებმა ბრიფინგზე ასევე გააჟღერეს სამი მთავარი მოთხოვნა. ეს მოთხოვნებია:

  1. შეწყდეს ძველი ბათუმის ნგრევა და გაუქმდეს აჭარის მთავრობასთან არსებული ზონალური საბჭო 
  2. რივიერას ტერიტორიაზე ბათუმის მერიამ და საკრებულომ არ დაუშვას მაღლივი კორპუსების მშენებლობა და ეს ტერიტორია ისევ დაბრუნდეს ისტორიული ზონის დაცვის საზღვრებში
  3. ბათუმის მერმა ნავსადგურის ტერიტორიაზე ქიმიური ტერმინალის აშენების ნებართვას არ მოაწეროს ხელი გზშ-ს ანგარიშის გარეშე.

შეწყდეს ძველი ქალაქის ნგრევა – მოძრაობა „დაიცავი ბათუმი“ საპროტესტო აქციას აანონსებს

ნეტგაზეთის მასალების სხვა გამოცემებში გადაბეჭდვის წესი
ავტორი