„ფარული ვიდეოკადრების გავრცელების საქმეზე“ ბათუმში კიდევ ერთი პირი – ზაალ ლატარია დააკავეს. ის ზუგდიდში ცხოვრობს და ყოფილი სამხედრო მოსამსახურეა.
შინაგან საქმეთა სამინისტროს ინფორმაციით, პოლიციამ ბრალდებულის საცხოვრებელ სახლში ჩხრეკა მოსამართლის განჩინების საფუძველზე ჩაატარა.
„გამოძიებით დადგინდა, რომ ბრალდებულმა მობილური ინტერნეტაპლიკაციის მეშვეობით გაავრცელა პირადი ცხოვრების ამსახველი ვიდეოჩანაწერი,“ – აღნიშნულია შინაგან საქმეთა სამინისტროს მიერ გავრცელებულ ინფორმაციაში.
შსს ასევე აცხადებს, რომ გამოძიება დანაშაულთან შემხებლობაში მყოფი სხვა პირების დადგენის მიზნით ისევ გრძელდება. გამოძიება 157-ე პრიმა მუხლის პირველი და მეორე ნაწილებით გრძელდება.
„ფარული კადრების გავრცელების საქმეზე“ შინაგან საქმეთა სამინისტრომ სულ 18 პირი დააკავა. აქედან 4 პირი სამართალდამცველებმა ბათუმში დააკავეს.
