„ფარული ვიდეოკადრების შენახვის და გავრცელების საქმეზე“ ბათუმში კიდევ ერთი პირი – ირაკლი ქასრაშვილი დააკავეს. იგი პროფესიით მეზღვაურია და 23 წლისაა.
„გაირკვევა ალბათ ყველაფერი. ეს ყველაფერი აბსურდია. ჩემს შვილს ღამის ორ საათზე მიუვიდა რაღაც ვიდეო, მეტი არაფერი ვიცი… როგორც ვიცი, მას ბრალი უკვე წაუყენეს,“ – გვითხრა ირაკლი ქასრაშვილის მამამ, გიორგი ქასრაშვილმა.
ამავე საქმეზე დღეს, პირველ თებერვალს, დილის 6 საათზე „ნაციონალური მოძრაობის“ აქტივისტი – ირმა ხოროიშვილი და მისი და, ინგა ხოროიშვილი დააკავეს. ადვოკატის თქმით, მათთვის ბრალი ჯერ არ წარუდგენიათ.
„ინგა რუსთავის წინასწარი დაკავების იზოლატორშია მოთავსებული, ირმა – ხაშურში. მათ ვირუსული ვიდეო მიიღეს, მაგრამ ამას არავითარი კავშირი არ აქვს დანაშაულთან. ამ ეტაპზე მხოლოდ ამის თქმა შემიძლია,“ – ამბობს ირმა და ინგა ხოროიშვილების ადვოკატი, ლევან დავითაია.
შინაგან საქმეთა სამინისტრომ პირადი ცხოვრების ინფორმაციის ხელყოფის მუხლით დღეს 16 ადამიანი დააკავა. სამინისტროს არ დაუკონკრეტებია დაკავებულების ვინაობა. ბრალის დადასტურების შემთხვევაში, მათ 4-დან 8 წლამდე თავისუფლების აღკვეთა ელით.
ნებისმიერი პირი, რომელიც უკანონოდ მოპოვებულ პირადი ცხოვრების ამსახველ ვიდეოს, რომელიც სოციალურ ქსელში გავრცელდა ან მას პირად ჩათში ჩაუგდეს, ნებისმიერი ფორმით შეინახავს (ტელეფონში ან კომპიუტერში) ან სხვას გადაუგზავნის (ოჯახის წევრი, მეგობარი) ისჯება კანონით.
ამ შემთხვევაშიც სასჯელის ზომა 4-დან 8-წლამდე პატიმრობა იქნება.
ამავე თემაზე:
https://netgazeti.ge/news/337630/
