Batumelebi | 40 მეტრი სიმაღლის შენობა ისტორიულ ბათუმში – ზონალური საბჭო თანახმაა, რას გადაწყვეტს მერი 40 მეტრი სიმაღლის შენობა ისტორიულ ბათუმში – ზონალური საბჭო თანახმაა, რას გადაწყვეტს მერი – Batumelebi
RU | GE  

40 მეტრი სიმაღლის შენობა ისტორიულ ბათუმში – ზონალური საბჭო თანახმაა, რას გადაწყვეტს მერი

კომპანია „გრინკო“ ბათუმის ისტორიულ ზონაში 40 მეტრი სიმაღლის შენობის აშენებაზე ნებართვას ითხოვს. საკითხი კულტურული მემკვიდრეობის ზონალურმა საბჭომ უკვე განიხილა და დადებითად გადაწყვიტა. საბოლოოდ, ნებართვას ხელი ქალაქის მერმა, ლაშა კომახიძემ უნდა მოაწეროს. ის ერთ-ერთ მისივე ორგანიზებულ შეხვედრაზე შეჰპირდა ძეგლების დამცველებს, რომ ისტორიულ ბათუმში, უკვე დადგენილი საზღვრების შიგნით, 12 მეტრზე მაღალი შენობები არ აშენდებოდა. მართალია, ისტორიული დაცვის ზონა ჯერ ოფიციალურად დამტკიცებული არ არის, მაგრამ ეს სამართლებრივად, მერს პირობის შესრულებაში ხელს ვერ შეუშლის.

ბათუმი, რუსთაველის ქუჩა #21 – ერთსართულიანი ბელეტაჟები

ეს ორსართულიანი სახლიც, რომელიც ბათუმის ბულვარს უყურებს რუსთაველის #21-ში მდებარეობს. იმ შემთხვევაში თუ შპს „გრინკო“ მშენებლობის ნებართვას მიიღებს, მას დანგრევა ემუქრება

შპს „გრინკო“ ბათუმში, რუსთაველის #21-ში რამდენიმე ერთსართულიანი ბელეტაჟისა და ქუჩის პირას მდებარე ორსართულიანი სახლის დემონტაჟის ხარჯზე ახალი მრავალბინიანი სახლის მშენებლობას გეგმავს.

წინასწარი მონაცემებით, გამოთავისუფლებულ 978 მეტრ მიწის ნაკვეთზე, ძეგლის დაცვის ზონაში, კომპანია 40 მეტრი სიმაღლის 12-სართულიან შენობას ააშენებს.

საკითხი კულტურული მემკვიდრეობის ზონალურმა საბჭომ უკვე განიხილა და კომპანიის მოთხოვნა დააკმაყოფილა. ეს იმას ნიშნავს, რომ მერიამ მიიღო რეკომენდაცია, მოთხოვნილ პარამეტრებზე მშენებლობას ბათუმის ცენტრალურ უბანში, ზღვასთან ახლოს, დასთანხმდეს და ნებართვა გასცეს. ეს, თავისთავად, არსებული შენობის დემონტაჟსაც გულისხმობს. ამ ადგილზე არსებულის სახლის დანგრევას და მაღლივი კორპუსის მშენებლობას არასამთავრობო ორგანიზაცია „ბათომი“ ეწინააღმდეგება.

საჯარო რეესტრის მონაცემებით ირკვევა, რომ კომპანიამ რუსთაველის #21-ში მდებარე ტერიტორიები, ნასყიდობის გაფორმებამდე არსებული შეთანხმების შესრულების პირობით შეისყიდა.

შპს „გრინკო“ ისრაელის მოქალაქემ თამარ კობრინსკიმ 2016 წელს დააფუძნა. თავდაპირველად კომპანიას არჩილ ჯანყარაშვილი ხელმძღვანელობდა, შემდეგ კი ის ლევან წივწივაძემ ჩაანაცვლა. ის ხელმძღვანელობს ასევე თამარ კობრინსკის მიერ დაფუძნებულ კიდევ ერთ სამშენებლო კომპანიას „ბი აი სი“-ს, რომელმაც ბათუმში რამდენიმე მაღლივი კორპუსი ააშენა. მათ შორის ერთ-ერთია ბათუმში ფარნავაზ მეფისა და ჰაიდარ აბაშიძის, ასევე გორგასლის ქუჩების გადაკვეთაზე არსებული მრავალბინიანი სახლი, რომელიც სამ კორპუსს აერთიანებს და მთელი კვარტალი უჭირავს. ამ სახლთან ახლოს კომპანიამ სამთავრობო პროგრამის არასათანადო-არასტანდარტული საცხოვრისის ლიკვიდიაციის პროგრამის  ფარგლებში კიდევ ერთი მრავალბინიანი სახლი ააშენა.

 

ნეტგაზეთის მასალების სხვა გამოცემებში გადაბეჭდვის წესი
ავტორი