„თუ, ხალხის არჩეული წევრის სიტყვას ფასი არ ექნება მერიის სამსახურების მხრიდან, მაშინ იძულებულები გავხდებით, რომ სამართლებრივი კუთხით დავაყენოთ ეს საკითხები და ასე მივაწვდინოთ ხმა. მე მიწევს იგივე საკითხის განმეორებით გაჟღერება“ – ამ განცხადებისთვის ბათუმის საკრებულოს წევრმა, არჩილ მამულაძემ სიტყვა საკრებულოს სხდომის დაწყებისთანავე, დღის წესრიგის დამტკიცებამდე მოითხოვა.
ის უკვე მერამდენე სხდომაა თამარის დასახლებაში მუნიციპალური ტრანსპორტის დანიშვნას ითხოვს:
„თამარის დასახლებიდან ბონის მიმართულებით, სადაც ათასობით ადამიანი გადაადგილდება, მუშაობდა #27 სამარშრუტო მიკროავტობუსი, რომელიც ამოიღეს. ახლა დანიშნულია #29, რომელიც ჩაისუბნიდან მოდის და ბენზეს დასახლებაში ჩამოდის გადატვირთული, ისე, რომ ტრანსპორტში შეღწევა შეუძლებელია. საღამოს საათებში კი, ერთხელ ჩამოივლის ისევ ამ მარშრუტით და ისიც გადატვირთული.“
საკრებულოს წევრმა სხდომაზე თქვა ისიც, რომ ამ პრობლემის მოუგვარებლობის სხვადასხვა მიზეზი დაუსახელეს, რაც მისთვის მიუღებელია.
არჩილ მამულაძემ თამარის დასახალებაში ინფრასტრუქტურასთან დაკავშირებულ პრობლემაზეც ისაუბრა და მოუწოდა მერიის სამსახურებს ყურადღება მიაქციონ ამ საკითხებს. მისი თქმით, თამარის დასახლებაში ეზოებში არ მუშაობს განათებები და ქუჩების ნაწილი ჩაბნელებულია.
