2018 წლის ბოლოს აჭარის მთავრობაში 400 ათასამდე ლარი ჯილდოს სახით მიიღეს


აჭარის მთავრობის სტრუქტურებში მომუშავე საჯარო მოხელეები, რომლებმაც, მათივე ხელმძღვანელების შეფასებით, კარგად იმუშავეს, 2018 წლის ბოლოს ფულადი ჯილდოთი წაახალისეს. აჭარის მთავრობის აპარატსა და ოთხ სამინისტროში, საერთო ჯამში, ფულადი ჯილდოს სახით 365 საჯარო მოხელეზე 400 000 ლარამდე გაიცა. ე.წ. ჯილდო, რომლის გაცემასაც კანონი ითვალისწინებს, აჭარის მთავრობის თავმჯდომარეს, აპარატის უფროსს, მინისტრებსა და მათ მოადგილეებს არ მიუღიათ.

მთავრობიდან გამოთხოვილი ინფორმაციით, „დაკისრებული ფუნქციების სანიმუშოდ შესრულებისა და მიმდინარე წლის განმავლობაში კეთილსინდისიერი სამსახურისთვის“ დააჯილდოვეს მხოლოდ დაბალი რანგის საჯარო მოხელეები. როგორც მთავრობიდან მიღებულ წერილში განმარტეს, საჯარო მოხელეები მათივე ხელმძღვანელებმა ქულებით შეაფასეს.

აჭარის მთავრობის აპარატში 98 საჯარო მოსამსახურეზე ფულადი ჯილდოს სახით სულ 103 034 ლარი გაიცა.  შვიდმა საჯარო მოხელემ მიიღო -100%-იანი, ოცმა – 75%-იანი, თორმეტმა – 60%-იანი, ორმოცდახუთმა – 50%-იანი, თოთხმეტმა კი 40%-იანი ჯილდო. კიდევ ოთხ პირს კი ჯილდო საერთოდ არ მიუღია – ცუდად მუშაობის გამო თუ რაიმე სხვა მიზეზით, ამაზე მთავრობის განმარტება არ გვაქვს.

აჭარის განათლების სამინისტრომ 2018 წლის დეკემბერში, საჯარო მოხელეებზე ჯილდო გადაანაწილა წლიური ხელფასის 6 და 6,20%-ის ოდენობით, ხოლო შრომითი ხელშეკრულებით დასაქმებულ პირებზე, წლიური ხელფასის 3,40% – 6,70%-ის ფარგლებში. საერთო ჯამში განათლების სამინისტროში 58 საჯარო მოხელეზე გაცემულია 69 208 ლარი.

აჭარის სოფლის მეურნეობის სამინისტროდან მოწოდებული ინფორმაციის მიხედვით, სამინისტროს თანამშრომლებზე სხვადასხვა პროცენტული მაჩვენებლით, ფულადი ჯილდოს სახით, 56 თანამშრომელზე გაცემულია 61 841 ლარი.

აჭარის ჯანდაცვის სამინისტრომ თანამშრომლების წახალისების მიზნით 30-60 პროცენტიანი ჯილდოები გასცა, სულ გაცემულია 57 860 ლარი 62 საჯარო მოხელეზე.

აჭარის ფინანსთა და ეკონომიკის სამინისტროში კი ჯილდო 95- მა საჯარო მოხელემ მიიღო, ჯილდოს  სახით  95 771 ლარი გადაანაწილეს.

წინასაახალწლოდ დააჯილდოვეს ბათუმის მერიის თანამშრომლებიც. ფულადი ჯილდო არ მიუღია მხოლოდ მერს, ვიცე-მერს და მოადგილეებს. ბათუმის მერიაში 174 თანამშრომელზე 154 986 ლარი გაიცა.

ჯილდოები არ გაუციათ აჭარის უმაღლესი საბჭოში.

ნეტგაზეთის მასალების სხვა გამოცემებში გადაბეჭდვის წესი
ავტორი