ბათუმის მაჟორიტარი საქართველოს პარლამენტში, ნუკრი/ლევან ბეჟანიძე, უზენაესი სასამართლოს მოსამართლეებად წარდგენილი კანდიდატების სიას მხარს არ დაუჭერს. ის ამბობს, რომ კანდიდატებიდან მისთვის რამდენიმე მიუღებელია, თუმცა სახელებსა და გვარებს არ აკონკრეტებს: ვისზეც ძირითადად არის წინააღმდეგობა, მათ ვგულისხმობო.
ნუკრი ბეჟანიძემ ამ გადაწყვეტილებას თავისი ამომრჩევლის დაკვეთა უწოდა. გარდა ამისა, პარლამენტარის განმარტებით, ასეთი დამოკიდებულების მიზეზი წარდგენილი კანდიდატების „საქმიანობა და განვლილი ცხოვრებაა“.
პარლამენტში წარდგენილი სია მიუღებელია ბათუმის კიდევ ერთი მაჟორიტარისთვის, ფატი ხალვაში ამბობს, რომ უარყოფითი პოზიცია უმრავლესობაში ბევრს აქვს: „ეს სია უნდა გადაიხედოს და კრიტერიუმების მიხედვით განისაზღვროს. საგაზაფხულო სესიისთვის უკვე გამოიკვეთება პოზიცია.“
ფატი ხალვაში ასევე იხსენებს წინა ხელისუფლების პირობებში მიღებულ სასამართლო გადაწყვეტილებებს. მისი თქმით, კარგად ახსოვს, თუ როგორ განიხილავდნენ მოსამართლეები მისი ძმის, ბიზნესმენ ქიბარ ხალვაშის საქმეს.
აბა, ის სია რა მოსაწონი იყო? – ასეთი რეაქცია ჰქონდა წარდგენილი კანდიდატების შესახებ პარლამენტარ სვეტლანა კუდბას. ის იუსტიციის უმაღლესი საბჭოდან კანდიდატების ახალ ნუსხას ელოდება: „იქნება ახალი სია, შევისწავლი და გადავწყვეტ, დავუჭერ თუ არა მხარს, ძველი სია უკვე აღარაა ძალაში. ყველას ვერ ვიტყვი, მაგრამ იქ იყვნენ ისეთები, რომლებიც ჩემთვის მიუღებელი იყვნენ. კიდევ კარგი, რომ სწორი გადაწყვეტილება მიიღო პარლამენტის თავმჯდომარემ და ახალ სიას ველოდებით“.
მიუღებელი იყო თუ არა ილია ნაკაშიძისთვის უზენაესი სასამართლოს მოსამართლეებად წარდგენილი კანდიდატების სია? – ვიცე-სპიკერი ამას არ აკონკრეტებს. მან გვითხრა, რომ ეს საკითხი დღის წესრიგიდან მოხსნილია. მისი თქმით, საკითხის დღის წესრიგიდან ამოღებამდე, „უფრო კანდიდატების მორალურ მხარეზე იყო საუბარი, კონკრეტული სახელებით და გვარებით საუბარი არ ყოფილა, ეს იყო კულუარული, ემოციური საუბარი… დიახ, წარსულზე, რა თქმა უნდა. იმაზე, თუ რა პირობებში მუშაობდა, იყო იძულებული თუ არ იყო იძულებული – ღრმად არ გვქონდა შესწავლილი ეს საკითხი. ვნებათაღელვა რომ დაიწყო საზოგადოებაში, შემდეგ დღის წესრიგიდან მოიხსნა“.
დაუჭერს თუ არა მხარს წარდგენილ კანდიდატებს იმავე შემადგენლობით ანზორ ბოლქვაძე – მაღალმთიანი აჭარის მაჟორიტარი დეპუტატი? – ის ამბობს, რომ ამ საკითხზე გადაწყვეტილებას ფრაქციასთან ერთად მიიღებს.
იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი 24 დეკემბერს დაასახელა.
https://netgazeti.ge/news/331819/
