შსს-მ 2018 წელს ოთხი კანონიერი ქურდი და 40 კიბერდამნაშავე დააკავა


შსს-ს ინფორმაციით, 2018 წელს, ე.წ. ოთხი კანონიერი ქურდი და „ქურდული სამყაროს“ 52 წევრი დააკავეს. უწყების თქმით, ეს სტატისტიკური მაჩვენებელი 477 პროცენტით მეტია წინა წლის მონაცემზე. „დაკავებულთაგან 19 პირს ბრალი ახალი მუხლებით წარედგინა“.

  • 2018 წელს სისხლის სამართლის წესით დასჯადი გახდა:
  • „ქურდულ შეკრებაში მონაწილეობა“
  • „ქურდული სამყაროს საქმიანობის მხარდაჭერა“
  • „ქურდული სამყაროს წევრისთვის ან კანონიერი ქურდისთვის მიმართვა“.

ტრეფიკინგის ბრალდებით კი, 2018 წელს დაკავებულია 42 პირი, რაც 66 პროცენტით მეტია წინა წელთან შედარებით – აცხადებს შსს.

ანგარიშის მიხედვით, კიბერდანაშაულთან ბრძოლის მიმართულებით შინაგან საქმეთა სამინისტრომ, მიმდინარე წელს, 40 კიბერდამნაშავე დააკავა.

„ნარკოტიკული საშუალების გასაღებისთვის პასუხისგებაში მიცემულია 117 პირი, ეს ციფრი 2-ჯერ მეტია, წინა წელთან შედარებით. მათ შორის ნარკოტიკებით ონლაინვაჭრობის ფაქტზე დაკავებულია 7 პირი“.

შსს-ს ინფორმაციით, საერთაშორისო საპოლიციო თანამშრომლობის მხრივ 2018 წელს მნიშვნელოვანი ნაბიჯები გადაიდგა, ფრანგ, ბერძენ, ესპანელ და პოლონელ კოლეგებთან ერთად.

„ევროკავშირის წევრ ქვეყნებში 19 ერთობლივი ოპერაცია ჩატარდა. შედეგად, მძიმე დანაშაულის ჩადენის ბრალდებით დაკავებულია საქართველოს 137 მოქალაქე, მათ შორის 13 ე.წ. კანონიერი ქურდი“.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com