2018 წლის 4 დეკემბერს 14:00 საათზე, „დემოკრატიული ჩართულობის ცენტრების ქსელის“ ბათუმის ოფისის ორგანიზებით, გენდერული ძალადობის წინააღმდეგ 16-დღიანი კამპანიის ფარგლებში, გაიმართება საინფორმაციო შეხვედრა ოჯახში ძალადობის მსხვერპლთა კრიზისული ცენტრებისა და თავშესაფრების შესახებ.
შეხვედრას წარუძღვება ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდის აჭარის წარმომადგენლობის ხელმძღვანელი ბექა მაჭუტაძე. ასევე, შეხვედრაში მონაწილეობენ შინაგან საქმეთა სამინისტროს ადამიანის უფლებათა დაცვის დეპარტამენტის წარმომადგენლები.
ცენტრის ინფორმაციით, შეხვედრაზე მიწვეულნი არიან ადგილობრივი ხელისუფლების, არასამთავრობო ორგანიზაციების წარმომადგენლები და სხვა დაინტერესებული პირები.
შეხვედრის მიმდინარეობისას საუბარი შეეხება ქალთა მიმართ ძალადობის საკითხებს, თავშესაფრებისა და კრიზისული ცენტრების საქმიანობასა და არსებულ გამოწვევებს, გენდერულ ძალადობასთან დაკავშირებულ სტატისტიკას, არსებულ პრობლემებსა და მათი გადაჭრის გზებს.
