დღეს, 27 ნოემბერს, ქუთაისი-ბათუმის მატარებელი, ერთ-ერთ ვაგონში აალებისა და დაკვამლიანების გამო, რამდენიმე წუთით გააჩერეს. როგორც ერთ-ერთი მგზავრი ამბობს, „მოხდა მოკლე ჩართვა, ხალხი პანიკაში იყო… მატარებელი გაჩერდა რამდენიმე წუთით, ის ვაგონი გაათავისუფლეს მგზავრებისგან, სხვა ვაგონში გადმოიყვანეს და ვაგრძელებთ ისევ ბათუმისკენ მოძრაობას“.
იმავე მგზავრის ინფორმაციით, როგორც მათ აუხსნეს, მიზეზი, მატარებლის შემადგენლობის გათბობის სისტემაში შექმნილი პრობლემა იყო, რის გამოც გათბობა მატარებელში გამორთეს.
„ბათუმელები“ შემთხვევის გამო „საქართველოს რკინიგზას“ დაუკავშირდა. „რაღაც გადახურება მოხდა და ის სისტემა გათიშეს. საშიში არაფერია. ასე რომ იყოს, მგზავრებს სხვა ვაგონში არ გადაიყვანდნენ“ – გვითხრეს „რკინიგზაში“.
ქუთაისი-ბათუმის ელექტრომატარებელში დაკვამლიანება განმეორდა, თუმცა მატარებელი მოძრაობას კვლავ განაგრძობს. „ბათუმელების“ წყაროს ინფორმაციით შემადგენლობა რამდენიმე ბავშვიანმა მგზავრმა დატოვა / 27.11.2018 /
