ბათუმის მერია ქალაქმშენებლობის სამსახურს აუქმებს – ვინ გასცემს სამშენებლო ნებართვებს?

ბათუმის მერია ქალაქმშენებლობისა და ურბანული პოლიტიკის სამსახურს აუქმებს.

მერიის გადაწყვეტილებით, ამ სამსახურის ფუნქციებს გადაიბარებს ახალი სსიპ -ი, რომელიც მერიამ უკვე შექმნა. ამასთან, მერიამ საკრებულოს დასამტკიცებლად წარუდგინა სამშენებლო-სანებართვო დოკუმენტაციის ელექტრონული საქმისწარმოების წესი. მზად არის სანებართვო მოსაკრებელთან დაკავშირებული ცვლილების პროექტიც.

ახალი სსიპ-ის შექმნასა და ამოქმედებასთან დაკავშირებით მერია საკრებულოს საშტატო ნუსხისა და თანამდებობრივი სარგოების გადახედვა-დაზუსტებასაც სთხოვს, შესაბამისი ცვლილება შედის სანებართვო მოსაკრებლის შემოღების შესახებ დადგენილებაში და სათათბირო საბჭოს საქმიანობის წესშიც.

საქმე ისაა, რომ ბათუმის მერიამ მშენებლობის ნებართვების დაჩქარებულად გასაცემად ახალი სსიპ-ი შექმნა. განაცხადებს ვერ ავუდივართო – ასე დაასაბუთა მერიამ ახალი სსიპ-ის შექმნის გადაწყვეტილება, გარდა ამისა, კვალიფიციური კადრების მოსაზიდად ხელფასების გაზრდა გვჭირდება, რასაც სსიპ-ის შემთხვევაში მოვახერხებთო. 

მერიამ მაშინ საკრებულოს განუმარტა ისიც, რომ ახალი სსიპ-ი ახალ შემოსავალს მოუტანდა ბიუჯეტს, რადგან მერია აპირებს დაჩქარებული მომსახურების ფასიანი სერვისის დანერგვას.

მიუხედავად იმისა, რომ ქაოსური განაშენიანება ქალაქში უამრავ პრობლემას ქმნის მერიაში „ბათუმის მუნიციპალიტეტის ტერიტორიაზე მშენებლობა წარმოადგენს ეკონომიკური და სოციალური განვითარების ერთ-­ერთ მნიშვნელოვან საფუძველს, რაც მშენებლობის ნებართვის გაცემის მიზნით გაზრდილ მომართვიანობას განაპირობებს“ – განმარტეს მერიაში.

ახალი სსიპ-ის მოვალეობა ქალაქმშენებლობასთან დაკავშირებული საკითხების მომზადება, მართვა და კონტროლია. რიგ შემთხვევებში ამ სამსახურში გადავიდა სფეროები, რომლებიც ამ დრომდე მუნიციპალური ინსპექციის კომპეტენცია იყო, როგორიც არის, მაგალითად, პროექტის დარღვევით აშენებული ობიექტების ან მათი ნაწილების ლეგალიზების შესახებ გადაწყვეტილების მიღება.

ახალი სსიპ-ის დასაკომპლექტებლად მერიას ვაკანტურ თანამდებობებზე კონკურსი უკვე გამოცხადებული აქვს 16 პოზიციაზე.

აპლიკანტებისგან მერია არქიტექტურის, მშენებლობისა და დიზაინის სფეროში მინიმუმ ერთწლიან გამოცდილებას ითხოვს.

კონკურსის პირობების მიხედვით, პირველი კატეგორიის სპეციალისტს მერია ხელფასის სახით 4480 ლარს, ხოლო მეორე კატეგორიის სპეციალისტებს 3520 ლარს შესთავაზებს; მესამე კატეგორიის სპეციალისტის ხელფასი კი 2880 ლარი იქნება. განყოფილების უფროსის ხელფასი 6400 ლარი იქნება. 

განაცხადების მიღება 18 სექტემბერს დასრულდა, კონკურსი სამეტაპიანია, რაც განაცხადების გადარჩევას, ზეპირ დავალებას და გასაუბრებას მოიცავს.

წარდგენილ ცვლილებებს საკრებულო 30 სექტემბერს განიხილავს.