აჭარის მიმდინარე წლის ბიუჯეტის სამი კვარტალის შესრულების ანგარიში დღეს, 31 ოქტომბერს, აჭარის მთავრობის სხდომაზე განიხილეს. ოფიციალური მონაცემებით, აჭარის რესპუბლიკური ბიუჯეტის შემოსულობები 15,1 პროცენტის გადაჭარბებით შესრულდა და 217 641 200 ლარი შეადგინა.
„ბიუჯეტი გადაჭარბებით შესრულდა“ – განაცხადა თორნიკე რიჟვაძემ მანამ, სანამ სხდომა ჟურნალისტებისთვის ტრადიციულად დაიხურებოდა. აჭარის ფინანსთა და ეკონომიკის მინისტრის, ჯაბა ფუტკარაძის თქმით კი, „გადაჭარბებით შესრულებაზე“ ამ შემთხვევაში დიდად აქცენტის გაკეთება არ ღირს.
სხდომის დასრულების შემდეგ „ბათუმელებმა“ ჯაბა ფუტკარაძეს, აჭარის ფინანსთა და ეკონომიკის მინისტრს ჰკითხა, რატომ უნდა მივიჩნიოთ შემოსავლების ზრდა ბიუჯეტის გადაჭარბებით შესრულებად, თან იმის გათვალისწინებით, რომ ყველა ხელისუფლება ანალოგიურ შეფასებას აკეთებს – „ბიუჯეტი გადაჭარბებით შევასრულეთ“.
„სწორად დასმული კითხვაა, აბსოლუტურად გეთანხმებით,“ – გვიპასუხა ჯაბა ფუტკარაძემ. – „როდესაც შემოსავლების ნაწილში გადაჭარბებაზე არის საუბარი, ამაზე დიდ აქცენტს არ ვაკეთებთ, რადგან რეალურად, თავის დროზე, როცა შემოსავლები იგეგმება, ცოტა კონსერვატიულად ვგეგმავთ და შესაბამისად, წლის განმავლობაში ხდება გადაჭარბებით შესრულება. ამაზე განსაკუთრებული აქცენტი არ გაგვიკეთებია და ამისგან დიდ პოზიტიურ ინფორმაციას არ ვაჟღერებთ…“.
აჭარის მთავრობამ დღევანდელ სხდომაზე 2019-2021 წლების პრიორიტეტების დოკუმენტიც განიხილა. პრიორიტეტების ჩამონათვალი საბიუჯეტო სექტორში ხარჯების შემცირებით იწყება. დოკუმენტის მიხედვით, აჭარის მთავრობა შრომის ანაზღაურების შემცირებას აპირებს 726 800 ლარით.
„ჯამში ადმინისტრაციული ხარჯი 1 მილიონ ლარზე მეტით მცირდება,“ – აღნიშნულია პრიორიტეტების დოკუმენტში.
აჭარის ფინანთა და ეკონომიკის მინისტრმა განმარტა, რომ შრომის ანაზღაურების ნაწილში ხარჯი შემცირდა, მაგრამ 2019 წელს რომელიმე საჯარო მოხელეს ხელფასი არ შეუმცირდება, არც თანამშრომლების გაშვებაზეა საუბარი.
„ეს მოხდა იმ უწყებების ხარჯზე, რომლებიც აჭარის მთავრობამ გააუქმა, მაგალითად, ტექნოლოგიების სამსახური, რომლის შექმნაც იგეგმებოდა და ამისთვის 2018 წლის ბიუჯეტში ხელფასებიც იყო გათვალისწინებული… დანარჩენი შემცირდა ადმინისტრაციული ხარჯებით, მაგალითად, ეკონომიკის სამინისტრომ 500 ლიტრით შეამცირა ყოველთვიურად საწვავის ხარჯი. ახლა მიმდინარეობს სამინისტროში ოპტიმიზაციის პროცესი. თუმცა ჩვენი მიზანია არა ვინმეს გათავისუფლება, არამედ ვინც მუშაობს, მათთვის მეტი ფუნქციის დაკისრება და ადამიანური რესურსის სწორად გადანაწილება. სამომავლოდ ველოდებით უკეთეს ტენდენციებს“, – თქვა ჯაბა ფუტკარაძემ ჟურნალისტებთან საუბრის დროს.
პრიორიტეტების დოკუმენტის მიხედვით, 2019 წელს 30 მიმართულებით არის დაგეგმილი გზის მშენებლობა, დასრულდება მაღალმთიანი აჭარის გაზიფიცირების პირველი ეტაპი, ჯანდაცვის სამინისტროს ბიუჯეტი 1 მილიონით გაიზრდება, ამავე ოდენობით იზრდება სკოლების მშენებლობის და აღჭურვის ბიუჯეტი.
2019 წელს აჭარის მთავრობა მუნიციპალიტეტების დაფინანსების გაზრდას დაახლოებით 10 მილიონით აპირებს. რომელ მუნიციპალიტეტს და რა პროგრამის შესასრულებლად მისცემენ ამ ფულს?
„10 მილიონი ეს არის ჯამში მთლიანად მუნიციპალიტეტებზე… საერთო ჯამში, გაეზრდებათ შემოსავლები მუნიციპალიტეტებს. ინკლუზიური ეკონომიკის განვითარება არის ჩვენი პრიორიტეტი. უშუალოდ ჩვენი სამინისტროს პროგრამებიც მიმართულია იქეთკენ, რომ მუნიციპალიტეტებში მოხდეს განვითარება. მომდევნო წელი იქნება კარგი მაგალითი ამ კუთხით. ისინი გრანტების სახითაც მიიღებენ 54 მილიონ ლარს,“ – გვითხრა ჯაბა ფუტკარაძემ, აჭარის ფინანსთა და ეკონომიკის მინისტრმა.
