დებულება, რომელიც ხელვაჩაურის საკრებულომ დღეს, 30 ოქტომბერს, დაამტკიცა, ადგენს ვინ შეასრულებს მუნიციპალიტეტის არჩეული მერის მოვალეობას მისი უფლებამოსილების შეჩერების ან შეწყვეტის შემთხვევაში და იმ შემთხვევაშიც, თუ თანამდებობაზე არც მოადგილეა დანიშნული ან თანამდებობიდან ისიც წავიდა.
ხელვაჩაურის მუნიციპალიტეტის მერი ჯუმბერ ვარდმანიძე ირწმუნება, რომ არსად წასვლას არ აპირებს და მერის დებულებაში ცვლილება მისი კანონმდებლობასთან შესაბამისობაში მოყვანის მიზნით შეიტანეს.
კითხვაზე, რატომ დადგა ეს საკითხი დღის წესრიგში ახლა და ხომ არ აპირებს ხულოს მერიის გამოცდილების გაზიარებას ხელვაჩაური? მერმა ჯუმბერ ვარდმანიძემ გვიპასუხა:
„საიდან აკეთებთ ასეთ დასკვნებს? – ჩვენთვის ასეთი დასკვნები არის მოწმენდილ ცაზე მეხის გავარდნა. ეს საკითხი დღის წესრიგში ახლა არ დამდგარა. ეს არის ჩვეულებრივი პროცედურა, შენიშვნა მოგვცეს, რომ დებულება კანონმდებლობასთან შესაბამისობაში იყო მოსაყვანი და გავასწორეთ. ჩახედეთ საჯარო სამსახურის შესახებ კანონში და ასევე თვითმმართველობის კოდექსში, ეს არის ჩვეულებრივი მოთხოვნა.“
დებულებაში ცვლილება მასში ხარვეზის შესწორებით ახსნა ხელვაჩაურის საკრებულოს თავმჯდომარემ, ნადიმ ვარშანიძემაც.
ხულოს არჩეული მერი ორი კვირის წინ თანამდებობიდან გაურკვეველ ვითარებაში გადადგა. თანამდებობის დატოვება მოუწია მის მოადგილესაც. შვებულებაში მყოფი გოჩა მელაძე იძულებული გახდა სამსახურში დაბრუნებულიყო, ჯერ მოადგილე გაეთავისუფლებინა და მის ნაცვლად ახალი მოადგილე დაენიშნა, მერე კი თავადაც გადამდგარიყო. მოგვიანებით გოჩა მელაძემ თქვა, რომ გადაწყვეტილება გადადგომაზე თვითონ მიიღო.
ხელვაჩაურში მერის დებულების ჩასწორებისას, სავარაუდოდ, ეს გამოცდილება გაითვალისწინეს.
ხელვაჩაურის საკრებულოს გადაწყვეტილებით, ანუ ახალი დებულებით, მერის მოვალეობა შეიძლება შეასრულოს მერის პირველმა მოადგილემ, ხოლო თუ ის თანამდებობაზე დანიშნული არ არის, მოვალეობის შესრულება დაევალება მერის სხვა მოქმედ მოადგილეს. იმ შემთხვევაში, თუ არჩეულ მერს ორზე მეტი მოადგილე ჰყავს, მერის მოვალეობის შესრულებას უხუცეს მოადგილეს ანდობენ.
იმ შემთხვევაში, თუ მერს არც პირველი და არც სხვა მოადგილე არ ჰყავს დანიშნული, მერის მოვალეობას ახალი მერის არჩევამდე საკრებულოს თავმჯდომარე შეასრულებს.
