ბათუმში, საარჩევნო უბანზე კენჭისყრის შეჩერების მიზეზი მოქალაქის პროტესტი გახდა. უსინათლო პენსიონერი, 89 წლის ნოდარ კვიჭიძე კართან დადგა და უბანზე არავის უშვებდა. იგი ამბობდა, რომ მას გადასატანი ყუთით სურდა ხმის მიცემა, ყუთი არ მიუტანეს და ამიტომაც, სხვების დახმარებით მოვიდა საარჩევნო უბანზე.
იგი აცხადებდა, რომ ახლა პროტესტის ნიშნად არ იღებდა მონაწილეობას არჩევნებში.
ადგილზე იმყოფებოდა ოლქის თავმჯდომარეც. მისი თქმით, მოქალაქეს მათთვის არ მოუმართავს გადასატანი ყუთის მოთხოვნით.
საარჩევნო უბანთან იმყოფებოდა პოლიციაც, თუმცა პოლიციელებმა მოქალაქის გაყვანა ვერ შეძლეს. საარჩევნო უბანზე მოვიდა პენსიონერის შვილი, რომელმაც მამის წაყვანა შეძლო.
