მთავარი,სიახლეები

ენმ-ს ბრიფინგი ბათუმის საარჩევნო უბნებში დარღვევების შესახებ

28.10.2018 • 1223
ენმ-ს ბრიფინგი ბათუმის საარჩევნო უბნებში დარღვევების შესახებ

„ნაციონალური მოძრაობის“ წევრის მირდატ ქამადაძის განცხადებით, ბათუმის რამდენიმე საარჩევნო უბანზე გამოვლინდა დარღვევები.

„ხელვაჩაურში, მე-18, მე-19 საარჩევნო უბნებზე ჩვენს წარმომადგენელს ხელში ჩაუვარდა „ქართული ოცნების“ კოორდინატორების სია, სადაც მითითებული იყო თანხები, თუ ვისზე რამდენი ლარი გაიცა. ჩვენი წარმომადგენელი მალე მოგვაწვდის ამ დოკუმენტსაც და მალე გამოვაქვეყნებთ.

დარღვევა იყო 41-ე უბანზე, ეს არის ბარცხანა, სადაც უბანი განთავსებულია მე-17 სკოლაში. საარჩევნო უბანზე შევიდა უცნობი პირი, რომელსაც არ ჰქონდა რაიმე დამადასტურებელი დოკუმენტი, არც ბეიჯი, არც მარკირება არ გაუვლია, შევიდა და რაღაც შეიტანა. როცა ჰკითხეს თუ ვინ იყო, არაფერი არ გვითხრა, კაპიშონი წამოიფარა თავზე, შემდეგ გვითხრა საჭმელი შევიტანეო, თუმცა არც ეს ფაქტი არ დასტურდება“-ამბობს ქამადაძე.

ენმ-ს წარმომადგენლის თქმით, ფაქტთან დაკავშირებით ვიდეო გადაიღეს. ქამადაძე ამბობს, რომ მომხდართან დაკავშირებით საჩივარიც დაიწერა.

მირდატ ქამადაძის თქმით, დარღვევები იყო 25-ე უბანზე: „როცა უბანი გაიხსნა წილისყრის პროცედურას ესწრებოდა პოლიციელი, რაც არის დარღვევა. 59-ე უბანზე აღმოჩნდა რომ მე-14 უბნის კომისიის წევრი იმყოფებოდა და ყველაზე მნიშვნელოვანი რაც არის, უბნებთან დგას ე.წ მარშრუტკები სადაც „ქართული ოცნების“ აგიტატორები სხედან და უბნის შესასვლელთან აგიტაციასაც ეწევიან“.

ქამადაძე ამბობს, რომ ისინი დაუკავშირდნენ პოლიციის ხელმძღვანელს და ამის შესახებ აცნობეს.

 

 

 

გადაბეჭდვის წესი


ასევე: