82 წლის იბრაიმ ჯინჭარაძემ დღეს ბათუმის საკრებულოს ღია კარის სხდომაზე ბათუმში, ბაგრატიონის ქუჩაზე მცხოვრებთა სათქმელი მიიტანა. მას თან ჰქონდა განცხადება, რომელსაც, მისვე თქმით, ამ ქუჩაზე მცხოვრებლებმა მოაწერეს ხელი. მისი განცხადება სხდომაზე ხმამაღლა წაიკითხეს.
ამონარიდი განცხადებიდან:
„ …ჩვენი ცხოვრება ბათუმის დასახლებულ ტერიტორიაზე დღითიდღე უარესდება, გვაწუხებს ხმაური და მტვერი, მტვერს იწვევს ვაჟა-ფშაველას ქუჩაზე განლაგებული საწყობები და მოძრავი ტრაილერები. ამ საწყობების მომარაგების მიზნით ჩვენს ქუჩაზე მოძრავი ტრაილერები ისეთ მტვერს წარმოქმნიან, რომ აქ ცხოვრება შეუძლებელია.
ისეთ მჭიდროდ დასახლებულ ტერიტორიაზე, როგორიც ბათუმია, კანონის უხეში დარღვევით მიმდინარეობს საწარმოების მუშაობა, რომელიც იწვევს ხმაურს, სუნს, ტოქსიკურ მტვერსა და სამშენებლო ნარჩენების დაგროვებას. ეს ყველაფერი აისახება ჩვენი უბნის მოსახლეობის, უპირველესად ბავშვებისა და მოხუცების ჯანმრთელობაზე. მოსახლოებას სახლის ფანჯარაც კი ვერ გაუღია მტვრის გამო. ჩვენს დასახლებაში მკვეთრად გავრცელებულია ფილტვებისა და ბრონქოასთმული დაავადებები. პლასტმასის საამქროდან გამომავალი ტოქსიკური ორთქლი პირდაპირ განაჩენია ჩვენი მოსახლეობისათვის.
თუ მერია და საკრებულო შესაბამის ღონისძიებებს არ გაატარებენ, ჩვენი ბავშვების ჯანმრთელობის გაუარესება ქალაქის ხელმძღვანელების სინდისზე იქნება. კერძოდ, ბათუმის საკრებულოსა და მერიას ვგულისხმობთ.
რაც შეეხება ტრანსპორტს, ეს საკითხი ბევრად უფრო მწვავეა, ტრაილერებით სამშენებლო მასალების გადატვირთვა-გადმოტვირთვის გამო თითქმის ყოველდღე, პრაქტიკულად რამდენიმე საათით, გადაკეტილია ქუჩა. ვერც სახანძრო დახმარება მიაღწევს მოსახლეობამდე და ვერც სასწრაფო დახმარება“.
იბრაიმ ჯინჭარაძემ საკრებულოს მიმართა კითხვით – ვინ აგებს პასუხს ხანძრით გამოწვეული ტრაგედიის შემთხვევში, თუ იქ სახანძრო მანქანა ან სასწრაფო დახმარება დროულად ვერ მიაღწევს? მისივე თქმით, მოსახლეობა ისეა გაღიზიანებული ამ ყველაფრით, რომ აპირებენ რადიკალურ ზომებს მიმართონ.
საკრებულოს თავმჯდომარე იბრაიმ ჯინჭარაძეს საკითხის შესწავლას და დროულ რეაგირებას დაჰპირდა.
დღეს საკრებულოს ღია კარის სხდომაზე უმეტესწილად ინფრასტრუქტურულ პრობლემებზე ისაუბრეს. ითქვა ისიც, რომ ზოგიერთი პრობლემა 2016 წლიდან მოუგვარებელია და ამაზე ბევრჯერ მიიღო მოსახლეობამ მერიისგან დაპირება, თუმცა უშედეგოდ.
