მიმდინარე წლის იანვრიდან სექტემბრის ჩათვლით ბათუმის საქალაქო სასამართლომ 18 გამამართლებელი განაჩენი გამოიტანა 828 საქმიდან. სტატისტიკურ მონაცემებს სასამართლო აქვეყნებს.
მონაცემების მიხედვით, ნაწილობრივ გამამართლებელი განაჩენი 7 საქმეზე დადგა, ხოლო 7 შემთხვევაში საქმის განხილვა შეწყდა. წელს სასამართლოს გამომძიებლებისთვის 9 საქმე უკან დაუბრუნებია.
2018 წლის პირველ ცხრა თვეში განხილული საქმეებიდან ნახევარზე მეტი – 485 საპროცესო შეთანხმებით დასრულდა. ანუ ამ შემთხვევებში მოსამართლეებს მოწმეების ჩვენებები არ მოუსმენიათ, ბრალდებულებმა ბრალი აღიარეს და მათთან შეთანხმება პროკურატურამ გააფორმა.
ბათუმის საქალაქო სასამართლოს 2017 წლის სტატისტიკის მიხედვით, სულ 817 საქმეზე შედგა საპროცესო შეთანხმება, 2016 წელს კი, 732 საქმე დასრულდა საპროცესო შეთანხმებით.
რაც შეეხება გამამართლებელ განაჩენებს: 2017 წელს სრულად გამართლდა 31 ადამიანი, ნაწილობრივ – 19.
