Batumelebi | აჭარის მთავრობის საქვეუწყებო დაწესებულებებში ოპტიმიზაციის პროცესი იანვრიდან დაიწყება აჭარის მთავრობის საქვეუწყებო დაწესებულებებში ოპტიმიზაციის პროცესი იანვრიდან დაიწყება – Batumelebi

აჭარის მთავრობის საქვეუწყებო დაწესებულებებში ოპტიმიზაციის პროცესი იანვრიდან დაიწყება

აჭარის მთავრობის საქვეუწყებო დაწესებულებებში, რომლებიც მთავრობის გადაწყვეტილებით სამინისტროების დაქვემდებარებაში იმუშავებენ, ოპტიმიზაცია მომავალი წლიდან დაიწყება. ამის შესახებ განმარტება  დღეს მთავრობის სხდომის მსვლელობისას აჭარის ფინანსთა და ეკონომიკის მინისტრმა, ჯაბა ფუტკარაძემ გააკეთა.

„იანვრამდე გააგრძელებენ მუშაობას ისე, როგორც ამ დრომდე მუშაობდნენ და იანვრიდან უკვე დაიწყება ფუნქციათა ანალიზი, შემდეგ კი – ოპტიმიზაციის პროცესი,“ – განმარტა მინისტრმა.

ოპტიმიზაციის პროცესს შესაძლოა შემცირებებიც მოჰყვეს, თუმცა ამას მთავრობაში ჯერჯერობით ოფიციალურად არ ადასტურებენ.

მთავრობის ოთხი საქვეუწყებო დაწესებულებიდან ორი – ტურიზმისა და გზების დეპარტამენტები აჭარის ფინანსთა და ეკონომიკის სამინისტროს, საარქივო სამმართველო – განათლების, ხოლო გარემოს დაცვის სამმართველო სოფლის მეურნეობის დაქვემდებარებაში გადავიდა.

აჭარის მთავრობის თავმჯდომარის, თორნიკე რიჟვაძის თქმით, ცვლილებები მცირე მთავრობის კონცეფციის ფარგლებში ხორციელდება.

 

ნეტგაზეთის მასალების სხვა გამოცემებში გადაბეჭდვის წესი
ავტორი