როგორც საქართველოს განათლებისა და მეცნიერების სამინისტროში „ბათუმელებს“ უთხრეს, ჯერ არ არის გადაწყვეტილი, თუ ვინ უხელმძღვანელებს მასწავლებელთა პროფესიული განვითარების ეროვნულ ცენტრს.
ბოლო დღეებია საინფორმაციო საშუალებები ავრცელებენ ინფორმაციას ამ პოსტზე ილიას სახელმწიფო უნივერსიტეტის განათლების ასოცირებული პროფესორის, ბერიკა შუკაკიძის დანიშვნის შესახებ.
ბერიკა შუკაკიძემ „ბათუმელებს“ უთხრა, რომ მისთვის ჯერ არ უცნობებიათ გადაწყვეტილების შესახებ და პასუხს ელოდება.
უნივერსიტეტის ვებგვერდზე განთავსებული ინფორმაციის თანახმად, ბერიკა შუკაკიძემ 1995 წელს დაამთავრა თბილისის ივ. ჯავახიშვილის სახელობის სახელმწიფო უნივერსიტეტის ეკონომიკის ფაკულტეტი, 2002 წელს მიიღო მაგისტრის ხარისხი ზოგადი განათლების მართვაში ნებრასკის სახელმწიფო უნივერსიტეტში. 2013 წელს დაიცვა დისერტაცია განათლებაში ილიას სახელმწიფო უნივერსიტეტში. აქვს 10-ზე მეტი სამეცნიერო ნაშრომი. იგი 2006-2010 წლებში მუშაობდა საქართველოს განათლებისა და მეცნიერების სამინისტროში, პროგრამების, მოგვიანებით კი ანალიტიკური დეპარტამენტის უფროსად.
მასწავლებელთა პროფესიული განვითარების ეროვნულ ცენტრს აქამდე გიორგი მაჩაბელი ხელმძღვანელობდა, რომელიც განათლების მინისტრმა 10 სექტემბერს გაათავისუფლა თანამდებობიდან.
