მთავარი,სიახლეები

აჭარაში ბიზნესომბუდსმენის წარმომადგენელი დაინიშნა

18.09.2018 • 2627
აჭარაში ბიზნესომბუდსმენის წარმომადგენელი დაინიშნა

დღეს, 18 სექტემბერს, საქართველოს ბიზნოსომბუდსმენის წარმომადგენლად აჭარაში ტარიელ გიორგაძე წარადგინეს.

აჭარაში ბიზნესომბუდსმენის წარმომადგენელი საქართველოს ბიზნესომბუდსმენმა ირაკლი ლექვინაძემ წარადგინა. ღონისძიებას აჭარის მთავრობის თავმჯდომარე და რეგიონში მოქმედი ბიზნესსექტორის წარმომადგენლები ესწრებოდნენ.

„ტარიელ გიორგაძეს აქვს მაგისტრის ხარისხი ეკონომიკაში. ასევე, ფლობს ამერიკის ეკონომიკური განათლების ნაციონალური საბჭოს დიპლომს. მას აქვს მუშაობის მრავალწლიანი გამოცდილება როგორც საჯარო, ასევე, კერძო და არასამთავრობო სექტორში. ტარიელ გიორგაძე იყო არასამთავრობო ორგანიზაცია ,,საქართველოს ახალგაზრდა ფინანსისტთა და ბიზნესმენთა ასოციაციის“ პრეზიდენტი. 2014-2018 წწ იკავებდა სსიპ სასამართლო ექსპერტიზის ეროვნული ბიუროს, აჭარის რეგიონული ექსპერტიზის დეპარტამენტის უფროსის პოზიციას,“- აღნიშნულია აჭარის მთავრობის მიერ გავრცელებულ ინფორმაციაში.

„ჩვენ ვაგრძელებთ თქვენი ბიზნესის ინვესტიციების მიმართ გარანტიების შექმნას და ხელშეუვალობის პრინციპი იქნება ერთ-ერთი მთავარი. ასევე, მნიშვნელოვანია ჩვენ შევქმნათ ინსტიტუციური გარემო. დღევანდელი დღე არის ამის მნიშვნელოვანი დადასტურება იმისთვის, რომ ერთი ბიუროკრატის ან ერთი ჩინოვნიკის ნებაზე არ იყოს ბიზნესი დამოკიდებული, მნიშვნელოვანია შეიქმნას ის ინსტიტუციები, ასევე ის თამაშის წესები, რომელიც ხელს შეუწყობს ბიზნესის კანონიერი ინტერესების დაცვას. მნიშვნელოვანია სახელმწიფომ მაქსიმალურად შეგიწყოთ ხელი როგორც კაპიტალზე ხელმისაწვდომობაზე, ასევე საერთაშორისო ბაზრებზე წვდომაზე. ამ კუთხით, ცენტრალურ ხელისუფლებასთან ერთად, კიდევ უფრო მეტი გაკეთდება,” – აღნიშნა თორნიკე რიჟვაძემ, აჭარის მთავრობის თავმჯდომარემ.

მთავარი ფოტო: ირაკლი ლექვინაძე, თორნიკე რიჟვაძე, ტარიელ გიორგაძე /აჭარის  მთავრობის ფოტო

გადაბეჭდვის წესი