„ბათუმობა 2018“-ის ფარგლებში დღეს ძველი ბათუმის რამდენიმე ქუჩაზე მეცხრამეტე საუკუნის ბათუმის კადრები გააცოცხლეს. ღონისძიება დღის 14:00 საათზე უნდა დაწყებულიყო, თუმცა ერთი საათის დაგვიანებით დაიწყო.

ფოტო: მანანა ქველიაშვილი/ბათუმელები
ქუჩებში მეცხრამეტე საუკუნისთვის დამახასიათებელი სამოსით გამოჩნდნენ მედუქნეები, გაზეთების დამტარებლები, ფოტოგრაფები, მოსეირნე წყვილები და რამდენიმე სცენა გაითამაშეს, მეფაიტონეები კი სტუმრებს ქუჩებში ფაეტონით გასეირნებას სთავაზობდნენ… გარდა ამისა, ძველი ბათუმის ქუჩებში გამოფენილი იყო ძველი ნივთები, ქუჩების ძველი აბრები, ძველი ჭურჭელი, იარაღი და სხვა. მსურველებისთვის ქვიშაზე ყავას ხარშავდნენ, გაიმართა ღვინის დეგუსტაცია და სპორტული შეჯიბრებები.

ფოტო: მანანა ქველიაშვილი/ბათუმელები
მუსიკალური ნომრები ბათუმის მერიის ქალთა ვოკალურმა ჯგუფმა და ქალაქ რიგიდან მოწვეულმა სტუმრებმა შეასრულეს.

ფოტო: მანანა ქველიაშვილი/ბათუმელები
„ბათუმობას“ აჭარის უმაღლესი საბჭოს თავმჯდომარე დავით გაბაიძე, მთავრობის თავმჯდომარე თორნიკე რიჟვაძე, ქალაქის მერი ლაშა კომახიძე და მთავრობის სხვა წევრები ესწრებოდნენ. ძირითადი სცენები მსახიობებმა სწორედ მათი გამოჩენის შემდეგ გაითამაშეს.

ფოტო: მანანა ქველიაშვილი/ბათუმელები
დღეს ძველი ბათუმის ქუჩებში ტრანსპორტით მოძრაობა შეზღუდული იყო, სამაგიეროდ ბევრი ადამიანი სეირნობდა. ბათუმობა დღეს გალა კონცერტით დასრულდება.

ფოტო: მანანა ქველიაშვილი/ბათუმელები