ბათუმში, მემედ აბაშიძის #40 -ში, ბიზნესმენ რუსლან კაკაბაძეს კულტურული მემკვიდრეობის ძეგლზე ორი სართულის დაშენება სურს, ამის შესახებ ინფორმაცია აჭარის კულტურული მემკვიდრეობის სააგენტოში დაგვიდასტურეს. ბიზნესმენმა სააგენტოს შესაბამისი პროექტის ესკიზი უკვე წარუდგინა.
სააგენტოს უფროსის მოვალეობის შემსრულებლის მირზა ცეცხლაძის ინფორმაციით, სააგენტოს საბჭომ მას ესკიზი დაუწუნა და რეკომენდაციები მისცა.
ბათუმის ცენტრში მდებარე საგარეო საქმეთა სამინისტროს ყოფილი შენობა და გამწვანებული ეზო, ჯამში 1128 კვადრატული მეტრი მიწის ფართობი და 664,8 კვადრატული მეტრი შენობა, აჭარის ფინანსთა და ეკონომიკის სამინისტრომ პირობიანი აუციონის წესით მილიონ 755 000 ლარად გაყიდა.
მესაკუთრეს, მთავრობასთან დადებული პირობის თანახმად, უკვე უნდა დაეწყო შენობის სარემონტო სამუშაოები, თუმცა ამ დროისთვის მას მხოლოდ ღობის რესტავრაციაზე აქვს ნებართვა.
ამავე თემაზე: სამინისტრო ძველ ბათუმში ძეგლს 1,72 მილიონ ლარად ყიდის
