მიკროავტობუსის მძღოლები ამ წუთებში ბათუმის მერიის მიმდებარე ტერიტორიაზე არიან შეკრებილი და მერიის იმ გადაწყვეტილებას აპროტესტებენ, რომელიც ქალაქში სამარშრუტო ხაზების შემცირებას შეეხება.
მძღოლები ამბობენ, რომ ხაზების გაუქმებით, ისინი, ფაქტობრივად, უმუშევარი რჩებიან.
„დღეში უნდა იმუშაოს 10-მა მარშრუტკამო, ამას ამბობს მერია, 40 ვმუშაობთ და სხვებმა რა უნდა ვქნათ, სად ვიმუშაოთ.
ეს ნომერი ოთხ სოფელს ემსახურება, ადამიანები ზოგი ქალაქში მუშაობს, ზოგი სწავლობს, ზოგი საავადმყოფოში მიდის და ბაგრატიონის ქუჩაზე რატომ უნდა ჩამოვიდნენ?“-ამბობს N36 სამარშრუტო ხაზის მძღოლი ზაზა შაინიძე.
მიკროავტობუსის მძღოლები ამბობენ, რომ ხაზების გაქუმებით ისინი უმუშევარი დარჩებიან
მძღოლების აზრით, ქალაქი არა მიკროავტობუსების რაოდენობის, არამედ კერძო ავტომობილების გამოა გადატვირთული. „ერთ ოჯახში 3-4 მანქანა რომ ჰყავთ და ქალაქში ფეხით არ დადიან და ყველა მანქანით რომ გადაადგილდება, ეს ტვირთავს ქალაქს და არა 40 მარშრუტკა, რომელიც საცობს ვერ შექმნის“.
მძღოლები ამბობენ, რომ ისინი არ არიან ტექნიკური მოთხოვნების წინააღმდეგი, მთავარია, არ დაკარგონ სამუშაო.
„ჩვენთვის მიუღებელია ხაზების შემცირება, ჩვენ ვკარგავთ სამუშაოს. ტექნიკური ხარვეზები რაც არის, ის გამოსწორდება. დააკვირდით მუნიციპალურ ავტობუსებს როგორი გამონაბოლქვი აქვთ, ისინი ბევრად აბინძურებენ ჰაერს, სახელმწიფო ანტომანქანებიც ვერ აკმაყოფილებენ სტანდარტებს, აი მაგათ მიხედონ,“ – ამბობს გია ფუტკარაძე.
ბათუმის მერია დღეს, 28 ივნისს, მიკროავტობუსის მძღოლების ახალი რეგულაციების დაწესებას აპირებს.
ფოტო: ლელა დუმბაძის
სამარშრუტო მიკროავტობუსის მძღოლები ამბობენ, რომ ისინი არ შეწყვეტენ საპროტესტო აქციას მანამ, სანამ მერია მათ მოთხოვნებს არ დააკმაყოფილებს.
მძღოლებმა მიკროავტობუსები მერიის მიმდებარე ტერიტორიაზე გააჩერეს.
გაფიცული მიკროავტობუსის მძღოლები
ფოტო: ლელა დუმბაძის
საკრებულოს მიერ უკვე მიღებული გადაწყვეტილებით ქალაქში აღარ უნდა იმოძრაონ სამარშრუტო მიკროავტობუსებმა, მაგალითად, შემდეგი ნომრებით: 22, 26, 35, 51, 55.
ამასთან, ბათუმის მერიის ინფორმაციით, დღეს ყოველდღიურად მუშაობს [სხვადასხვა სამარშრუტო ხაზზე] 460 მიკროავტობუსი. მერიისა და საკრებულოს გადაწყვეტილებით, მათი რაოდენობა 250-მდე უნდა შემცირდეს.
ქალაქში 2018 წლის პირველი ივლისიდან ახალი სქემით უნდა ემოძრავათ შემდეგ მიკროავტობუსებს: №№ 20, 21, 24, 25, 28, 29, 30, 31, 32, 33, 34, 36, 39, 40, 42, 44, 45, 46, 47, 49, 52, 56.
თუმცა მერიაში აცხადებენ, რომ ახალი სქემა ახალი კონკურსისა და ნებართვების გაცემის შემდეგ ამოქმედდება.
ახალი კონკურსის პირობები და კრიტერიუმები კი საკრებულომ დღეს, 28 ივნისს, სხდომაზე უნდა განიხილოს.
ამ თემაზე:
https://batumelebi.netgazeti.ge/news/140143/
https://batumelebi.netgazeti.ge/news/143403/
https://batumelebi.netgazeti.ge/news/143310/
