14 ივნისს ბათუმის თანამედროვე ხელოვნების სივრცეში ჩეხი ფოტოგრაფის, კარელ ცუდლინის მასტერკლასი გაიმართება. ცუდლინი დოკუმენტური ფოტოგრაფიის მიმართულებით მუშაობს, მას ჩეხეთის პრესის ფოტოგრაფიის პრიზი 18-ჯერ აქვს მოპოვებული.
ჩეხმა ფოტოგრაფმა საქართველოში თავისი ერთ-ერთი ყველაზე ცნობილი ფოტოსერია ჩამოიტანა – საბჭოთა ჯარისკაცები ტოვებენ ჩეხოსლოვაკიას.
ფოტოგრაფი მასტერკლასზე დამსწრეებს თავის ნამუშევრებს წარუდგენს და მათზე მუშაობის პროცესზე მოუყვება. გაიმართება დისკუსია კითხვა-პასუხის რეჟიმში. მასტერკლასზე დამსწრეებს ექნებათ საშუალება, მოიტანონ თავიანთი პორტფოლიო და მიიღონ პროფესიული რჩევები კარელ ცუდლინისგან.
მასტერკლასი 12 საათზე დაიწყება. მასზე დასწრება უფასოა და ნებისმიერ მსურველს შეუძლია.