ჩაქვში, უმაღლესი საბჭოს მიმდებარე ტერიტორიაზე, მოსახლეობა საპროტესტო აქციას მართავს. აქციის მონაწილეები ჩაქვიდან დენდროლოგიური პარკისთვის მორიგი ხის გადატანას აპროტესტებენ და აცხადებენ, რომ აქამდე ხეების გადატანის შედეგად საავტომობილო გზა დაზიანდა, მის აღდგენას კი არავინ აპირებს.
„ბოლო ორი ხე დარჩა გადასატანი. ჩვენ დაგვპირდნენ, რომ დაზიანებულ გზას გააკეთებდნენ, მაგრამ დღეს კომპანია გვეუბნება, რომ გზის აღდგენა მისი ვალდებულება არ არის. ამ ტერიტორიიდან ივანიშვილმა რამდენიმე ხე წაიღო. გზა ავარიულ მდგომარეობაშია, მანქანებს ამ გზაზე გავლა უკვე უჭირთ და ადამიანები კალოშებით დადიან, ისეთი მდგომარეობაა. ჩვენ არ ვაპირებთ დაშლას, ვიდრე ამ გზას არ მოაწესრიგებენ. მოვითხოვთ ხის გადატანის სამუშაოების შეჩერებას,“ – გვითხრა ჩაქვში მცხოვრებმა მერაბ ბეჟანიძემ.
აქციაზე იმყოფება უმაღლესი საბჭოს წევრი „ნაციონალური მოძრაობიდან“ ელგუჯა ბაგრატიონი. იგი მიიჩნევს, რომ მოსახლეობის მოთხოვნა სამართლიანია და კომპანია „ზიმოს“ წარმომადგენლებთან შეხვედრას გეგმავს. ბაგრატიონის თქმით, ეს კომპანია ასრულებს ამ ტერიტორიიდან ხეების გადატანას.
„მოსახლეობა მოითხოვს იმ გზის შეკეთებას, რომელიც ხის გადატანისგან არ დაზიანებულა,“ – ამბობს ქობულეთის მერის წარმომადგენელი დაბა ჩქავში, გიორგი ქებულაძე. იგი განმარტავს, რომ გზას, რომელიც მძიმე ტექნიკამ დააზიანა, კომპანია „ზიმო“ გაარემონტებს, მაგრამ მოსახლეობა ითხოვს მიმდებარე გზების კეთილმოწყობასაც.
„ახლა ადგილზე იმყოფებიან საავტომობილო გზების დეპარტამენტის წარმომადგენლები. ჩვენ ერთად ვმსჯელობთ, რა შეიძლება იყოს უკეთესი მოსახლეობისთვის. თავისთავად კომპანია არ გააკეთებს იმ გზის რეაბილიტაციას, სადაც მძიმე ტექნიკას არ გაუვლია,“ – გვითხრა გიორგი ქებულაძემ.
ფოტოები მოგვაწოდა უმაღლესი საბჭოს წევრმა, ელგუჯა ბაგრატიონმა
