დღეს, 24 მარტს, სამთო-სათხილამურო კურორტ გოდერძიზე თოვლის საფარი ტრადიციული თეთრის ნაცვლად მოვარდისფეროა.
როგორც “ბათუმელებს” კურორტის ადმინისტრაციაში უთხრეს, გუშინ, 23 მარტს, კურორტზე ყვითელი წვიმა წამოვიდა, რომელმაც თოვლს ფერი შეუცვალა.
ტალახიანი წვიმის მიზეზი, რომელიც 23 მარტს აჭარაში მოვიდა, როგორც სინოპტიკოსებმა ახსნეს, საჰარადან გავრცელებული ქვიშიანი ქარი გახდა.
ქარს, რომელმაც საქართველოში მტვრის ნარჩენები გადმოიტანა – სიროკო ჰქვია. ის ჩრდილოეთ აფრიკაში, უდაბნოში წარმოიშვა. სიროკო სამხრეთ-დასავლეთის ქვეყნებისთვის დამახასიათებელი ძლიერი ქარია.
როგორც კურორტის ადმინისტრაციაში ამბობენ, დღეისთვის კურორტზე საკმაოდ ბევრი დამსვენებელი ჰყავთ.
ფოტო: Goderdzi Resorts
ფოტო: Goderdzi Resorts
