ბათუმის ცენტრალურ პარკში, ნავსადგომთან, კოლონების აღდგენისათვის საჭირო საპროექტო-სახარჯთაღრიცხვო დოკუმენტაციის მომზადებაში ტურისტული ობიექტების მართვის სააგენტო 6 ათასამდე ლარს გადაიხდის. ხარჯთაღრიცხვის მომზადების შემდეგ დაზუსტდება, რამდენი დაიხარჯება კოლონადის აღსადგენად, თუმცა გადაწყვეტილია, რომ კოლონები იქნება რკინა-ბეტონის კონსტრუქციის. სააგენტოს კოლონადის ესკიზი, პირდაპირი წესით, უკვე შესყიდული აქვს.
საპროექტო-სახარჯთაღრიცხვო დოკუმენტაციას სააგენტო ტენდერის მეშვეობით შეისყიდის, სადაც წინადადებების მიღება 2018 წლის 5 მარტს დაიწყება და 7 მარტს დასრულდება. დოკუმენტაცია მზად უნდა იყოს გამარჯვებულთან ხელშეკრულების გაფორმებიდან 15 დღის ვადაში.
ტექნიკური დავალების შესაბამისად, უნდა მომზადდეს სამშენებლო დოკუმენტაცია და დადგინდეს ობიექტის ღირებულება. საპროექტო დოკუმენტაცია უნდა მოიცავდეს:
• სიტუაციურ გეგმას
• ტოპოგეგმას
• გენ.გეგმას
• ჭრილების ნახაზებს
• ფასადის ნახაზებს
• ფუძე-საძირკვლის კონსტრუქციას (საჭიროების შემთხვევაში ჰიდროლოგიურ დასკვნას)
• გეოლოგიურ დასკვნას
• კოლონადის სვეტებისა და მოაჯირების კონსტრუქციულ ნახაზებს
• ელექტროგაყვანილობისა და განათების გეგმას
• იატაკის მოპირკეთების სქემას
• ლოკალურ-რესურსულ ხარჯთაღრიცხვას
• ვიზუალიზაციას ფოტომონტაჟით
• განმარტებით ბარათს
ამავე თემაზე:
https://batumelebi.netgazeti.ge/news/116559/
![ბათუმში მეზღვაურთა საერთაშორისო დღე აღინიშნება, რისთვისაც ნახევარი მილიონი ლარი დაიხარჯება [ფოტო]](https://batumelebi.netgazeti.ge/wp-content/uploads/2026/06/11.png "ბათუმში მეზღვაურთა საერთაშორისო დღე აღინიშნება, რისთვისაც ნახევარი მილიონი ლარი დაიხარჯება [ფოტო]")
