მახუნცეთში, ღვინის სახლისა და ჩანჩქერის მიმდებარე ტერიტორიებზე არსებულ ავტოსადგომებზე დისტანციური, პულტით მართვადი ბარიერები მოეწყობა და პარკინგიც ოფიციალურად ფასიანი გახდება.
პულტით მართვადი ვერტიკალური ბარიერების მოსაწყობად ქედის მერიამ სახელმწიფო შესყიდვა 25 000 ლარზე უკვე გამოაცხადა.
ქედის მერის მოადგილის, როლანდ ბერიძის ინფორმაციით, მას შემდეგ, რაც მერია მახუნცეთში ავტოსადგომებზე პულტით მართვად ხელოვნურ ბარიერებს მოაწყობს, პარკინგი სამართავად მერიის ბალანსზე არსებულ შპს „ქედის კომუნალურსერვისს“ გადაეცემა.
რაც შეეხება პარკინგის ტარიფს, მერის მოადგილის თქმით, ჯერ საფასური განსაზღვრული არ არის.
„მახუნცეთი ტურისტებისთვის მიმზიდველი ადგილია, ბევრი ვიზიტორი ჰყავს, შესაბამისად, რომ არ იყოს ქაოტური მოძრაობა, მუნიციპალიტეტმა გადაწყვიტა მოაწყოს პარკინგი. დაიხაზება ტერიტორია, დაყენდება ხელოვნური ბარიერები და ასევე განთავსდება სალარო აპარატი, რომლითაც პარკინგით მოსარგებლე შეძლებს გადაიხადოს საფასური. პარკინგი სამართავად ქედის კომუნალურსერვისს გადაეცემა, მოსაკრებელსაც თვითონ აიღებს. რაც შეეხება მომხმარებლებისთვის პარკინგის გადასახადს, ამ დროისთვის ტარიფი დაზუსტებული არ არის,“ – ამბობს როლანდ ბერიძე.
სახელმწიფო შესყიდვით, ქედის მერია ხელოვნური ბარიერებისთვის სულ 20 პულტს შეისყიდის.
