მთავარი,სიახლეები

საკრებულომ სკვერის სტატუსი ადგილს კორპუსის აშენების შემდეგ მიანიჭა 

15.02.2018 • 2745
საკრებულომ სკვერის სტატუსი ადგილს კორპუსის აშენების შემდეგ მიანიჭა 

ჯავახიშვილის ქუჩაზე, სასამართლოს ყოფილი შენობის წინ მდებარე მიწის ნაკვეთს ბათუმის საკრებულომ ივანე ჯავახიშვილის სკვერის სტატუსი მიანიჭა. სკვერის სტატუსი ამ ადგილს მრავალსართულიანი კორპუსის აშენების შემდეგ ექნება.

საკითხი საკრებულოს სხდომაზე ირაკლი პატარიძემ გამოიტანა, განათლების, კულტურისა და სპორტის კომისიის თავმჯდომარემ. საკრებულოს წევრობამდე ირაკლი პატარიძე მერის წარმომადგენელი იყო ხიმშიაშვილის ადმინისტრაციულ ერთეულში.

„თუკი გინდოდათ სკვერი ამ ადგილას, კორპუსი რატომ ჩადგით შიგ? თქვენ მერის რწმუნებული იყავით ამ ადგილას,“ – მიმართა მომხსენებელს საკრებულოს წევრმა „ნაციონალური მოძრაობიდან“ მირდატ ქამადაძემ.

„მერის წარმომადგენელი არ იღებდა ამ გადაწყვეტილებას… ჩვენი სურვილია, რომ იქ იყოს სკვერი,“ – აღნიშნა ირაკლი პატარიძემ.

„საზოგადოებამ დააფიქსირა პროტესტი და ჩვენ ეს გავითვალისწინეთ,“ – თქვა საკრებულოს უმრავლესობის კიდევ ერთმა წევრმა, ირაკლი მიქელაძემ.

ჯავახიშვილისა და აბუსერიძის ქუჩების კვეთაში მრავალსართულიანი კორპუსის მშენებლობა 2015 წელს დაიწყო, რამაც საზოგადოების პროტესტი გამოიწვია. აქ DS group-ი აშენებს. მშენებლობისთვის სწორედ აღნიშნული სკვერის ნაწილი [ჯავახიშვილისა და აბუსერიძის ქუჩების კვეთაში] გამოიყენეს.

ჯავახიშვილის ქუჩაზე გამწვანებული ადგილი, დღეს უკვე სკვერი, რეესტრში სამ საკადასტრო ერთეულადაა დარეგისტრირებული. სამივე ნაკვეთი ქალაქ ბათუმის მერიის საკუთრებაშია და ჯამში 2 550 კვ/მ-ია.

მთავარი ფოტო: სკვერი ჯავახიშვილის ქუჩაზე, რომლის ნაწილზეც დღეს კორპუსი შენდება. ფოტო: „ბათუმელების“ არქივიდან. 

გადაბეჭდვის წესი


ასევე: