ვინ მოჭრა ვაზი ბათუმის მეორე სკოლასთან? [ფოტოამბავი]

ბათუმში, მელიქიშვილის ქუჩაზე, მეორე საჯარო სკოლასთან, ვაზი მოჭრეს. ბათუმის გამწვანების სამსახურში გვითხრეს, რომ ვაზი მათ არ მოუჭრიათ და მათ სამსახურში არც წერილობითი შეტყობინება შესულა ვაზის მოჭრაზე ნებართვის მისაღებად.

ვაზის უნებართვო ჭრაზე ინფორმაცია არც ბათუმის მერიის ზედამხედველობის სამსახურს მიუღია. ორივე სამსახურში „ბათუმელებს“ უთხრეს, რომ საკითხით დაინტერესდებიან და შესაბამის რეაგირებას მოახდენენ.

ვაზის მოჭრაზე უკვე შეადგინეს სამართალდარღვევის აქტი გარემოსდაცვითი ზედამხედველობის დეპარტამენტის წარმომადგენლებმა. უწყების პრესსამსახურში ამბობენ, რომ უცნობია, ვინ მოჭრა ვაზი. ეს უწყება მუნიციპალიტეტის ინფორმაციას დაელოდება იმის გასარკვევად, არის თუ არა გაცემული შესაბამისი ნებართვა. ნებართვის არარსებობის შემთხვევაში, გარემოსდაცვითი ზედამხედველობის დეპარტამენტი ვაზის მოჭრის ფაქტზე შედგენილ აქტს რეაგირებისთვის შინაგან საქმეთა სამინისტროს გადაუგზავნის.