მთავრობის პასუხი „ნაციონალურ მოძრაობას“ ხელფასების მატებაზე

აჭარის მთავრობა „ერთიანი ნაციონალური მოძრაობის“ დღეს გამართულ ბრიფინგს ეხმაურება. „ნაციონალური მოძრაობის“ წევრმა, რეზო ხარაზმა, აჭარის მთავრობის ახალი სახელფასო განაკვეთები მეეზოვეებისა და საბავშვო ბაღების აღმზრდელების ხელფასებს შეადარა და განაცხადა, რომ მაღალი თანამდებობის პირები პრივილეგირებულები არიან.

ბესიკ ლილუაშვილი, აჭარის მთავრობის აპარატის სტრატეგიული განვითარების დეპარტამენტის უფროსი აცხადებს, რომ ეს არის „ნაციონალური მოძრაობის მორიგი ტყუილი და საზოგადოების სიცრუეში შეყვანის მორიგი მცდელობა“:

„საზოგადოების ინფორმირებულობის მიზნით, კიდევ ერთხელ განვმარტავთ: მთავრობის თავმჯდომარის ხელფასი (სარგო და დანამატი) პირველ იანვრამდე შეადგენდა 5793 ლარს (დარიცხვით, რასაც აკლდება 20%), პირველი იანვრიდან კი შემცირდა და განისაზღვრა 5750 ლარით (დარიცხვით).

უშუალოდ მთავრობის აპარატის საჯარო მოხელეთა წლიური სახელფასო ფონდი არათუ გაიზარდა, არამედ შემცირდა 60 030 ლარით, რაც განაპირობა მთავრობის თავმჯდომარის გადაწყვეტილებამ ორი მრჩევლისა და ორი თანაშემწის, სულ 4 საშტატო ერთეულის შემცირებაზე.

რაც შეეხება სხვა დანარჩენ მოხელეებს, მათ შორის დეპარტამენტის უფროსებს, განყოფილების უფროსებსა და სპეციალისტებს, ამ შემთხვევაში მოხდა სახელფასო სარგოს სახელფასო შკალასთან შესაბამისობაში მოყვანა და მათ მცირედით, მაგრამ გაეზარდათ ხელფასები, თუმცა ერთხელ და სამუდამოდ დასრულდა საუბრები სადღესასწაულო თუ კვარტალურ პრემიებსა თუ დანამატებზე.

რაც შეეხება ბაღის აღმზრდელების ანაზღაურებას, აღმზრდელის ხელფასი 240 კი არა 420 ლარია. თუმცა, რამდენადაც ჩვენთვისაა ცნობილი, მერია ბაღებთან მიმართებაში რეორგანიზაციას ახორციელებს და არის საუბარი სახელფასო სარგოს გაზრდასთან დაკავშირებით.“

აჭარის მთავრობამ ავტონომიური რესპუბლიკის აღმასრულებელი ხელისუფლების დაწესებულებებში თანამდებობრივი სარგოს [ხელფასის] განაკვეთები, ახალი წესის შესაბამისად, 2018 წლის 18 იანვარს დაამტკიცა. ახალი კანონმდებლობით, საჯარო დაწესებულებებში დასაქმებულ პირებს 2018 წლის იანვრიდან ხელფასთან ერთად დანამატისა და პრემიის მიღებაც შეუძლიათ, რომელსაც ფულადი ჯილდო ერქმევა. თუმცა დანამატი წლის განმავლობაში ჯამში არ უნდა აღემატებოდეს წლიური თანამდებობრივი სარგოს 20%-ს, ხოლო ფულადი ჯილდო – 10%-ს.