შინაგან საქმეთა სამინისტროს ინფორმაციით, საქართველოს შინაგან საქმეთა მინისტრს, გიორგი გახარიასა და თურქეთის შინაგან საქმეთა მინისტრს, სულეიმან სოილუს შორის სატელეფონო საუბარი შედგა.
„მხარეები შეთანხმდნენ, რომ თურქეთის სახელმწიფო საზღვრის კვეთასთან დაკავშირებით, 2018 წლის 1-ელი იანვრიდან ამოქმედებულ რეგულაციებთან დაკავშირებით საქართველოსა და თურქეთის შესაბამისი უწყებები გააგრძელებენ კონსულტაციას, რომლის დასრულებამდეც აღნიშნული რეგულაციები საქართველოს მოქალაქეებზე არ გავრცელდება,“ – აცხადებს შსს.
სამინისტროს ინფორმაციით, „მხარეებმა მიმდინარე წლის დასაწყისში საქართველოში თურქეთის რესპუბლიკის შინაგან საქმეთა მინისტრის დაგეგმილ ვიზიტთან დაკავშირებითაც ისაუბრეს, რომლის ფარგლებშიც, ასევე, განხილული იქნება თანამშრომლობის საკითხები, მათ შორის, საზღვრის კვეთასთან დაკავშირებით“.
გუშინ, 16 იანვარს, სარფში საქართველოს მოქალაქეებმა ის ცვლილებები გააპროტესტეს, რომლებიც თურქეთის რესპუბლიკამ ახლახან მიიღო და რაც ამ ქვეყნის საზღვარზე მოქალაქეების მიმოსვლას არეგულირებს. ეს რეგულაციები პირდაპირ ეხება საქართველოს იმ მოქალაქეებს, რომლებიც ყოველდღიურად გადადიან თურქეთში სამუშაოდ.
გუშინ, აჭარის მთავრობის თავმჯდომარე, ზურაბ პატარაძე ართვინის გუბერნატორს შეხვდა.
https://batumelebi.netgazeti.ge/news/110653/
