ფართობში, რაზედაც ბათუმის სტუდიისთვის ერთი სართული უნდა დააშენოს, საზოგადოებრივმა მაუწყებელმა 88 596 აშშ დოლარი გადაიხადა. მაუწყებელი ამ თანხის ოდენობას არ ასაჯაროებდა. ამის მიუხედავად „ბათუმელებმა“ მოახერხა ნასყიდობის ხელშეკრულების მოპოვება.
შპს REAL PALACE-სა და სსიპ საზოგადოებრივ მაუწყებელს შორის ხელშეკრულება 492,2 კვ/მ ფართობის შესყიდვაზე მიმდინარე წლის 10 აგვისტოსაა გაფორმებული. ხელშეკრულებას ხელს საზმაუს მხრიდან გენერალური დირექტორი, ვასილ მაღლაფერიძე აწერს. ხელშეკრულების მიხედვით 88 596 აშშ დოლარის ექვივალენტი ეროვნულ ვალუტაში, გადახდის დღისთვის არსებული კურსით, მაუწყებელს კომპანიისთვის ხელშეკრულების გაფორმებიდან 10 საბანკო დღის განმავლობაში უნდა გადაერიცხა.
ამ თანხაში, ხელშეკრულების მიხედვით, უნდა შესულიყო დასრულებული ფასადი, სახურავი და დამონტაჟებული ლიფტები. თავის მხრივ მაუწყებელმა არ უნდა დაარღვიოს ფასადების იერსახე. ამის მიუხედავად, მაუწყებელი ფასადსაც ცვლის [შენობის პროექტის ავტორისგან შესყიდული ახალი პროექტი, რაშიც 23 600 ლარი გადაიხადა] და სახურავსაც [ასევე გადააკეთებს ლიფტის ტექნიკურ სართულსაც].
„შენობა ექსპლუატაციაში მიღებულია რამდენიმე თვის უკან. 25-ე სართულის სახურავზე ხდება საზოგადოებრივი მაუწყებლის ოფისის დაშენება. სახურავზე ამოდის კიბის უჯრედი და ლიფტის ტექნიკური სართული,“ – აღნიშნულია პროექტში.
ბათუმში, ფიროსმანის ქუჩაზე მდებარე, 25-სართულიან შენობაზე 26-ე სართულის დაშენებისთვის საზმაუ დამატებით 1 მილიონ ლარამდე გადაიხდის.
„ბათუმის ოფისთან“ დაკავშირებით საზოგადოებრივ მაუწყებელს „ბათუმელებმა“ რამდენიმე კითხვა დაუსვა, თუმცა მაუწყებელმა არც ერთ კითხვას პასუხი არ გასცა, მათ შორის:
- იყო თუ არა შესაძლებელი და თუ არა რატომ, მაუწყებლის ოფისი განთავსებულიყო საზოგადოებრივი მაუწყებლის აჭარის ტელევიზიისა და რადიოს სარგებლობაში არსებულ შენობაში?
- ხომ არ იგეგმება ბათუმში ახალშეძენილ ფართობში აჭარის ტელევიზიისა და რადიოს განთავსება?
ამ კითხვებს ერთგვარი პასუხი აჭარის საზოგადოებრივმა მაუწყებელმა (აჭარის ტელევიზიამ) გასცა, როცა მან საქართველოს პრემიერ-მინისტრს, აჭარის მთავრობასა და უმაღლეს საბჭოს მიმართა ახალი შენობის გადაცემის თხოვნით.
„აჭარის ტელევიზია განთავსებულია კულტურული მემკვიდრეობის უძრავი ძეგლის სტატუსის მქონე ორსართულიან შენობაში. თანამშრომელთა უმეტესობას სამუშაო ადგილი არ გააჩნია. ოთახების დიდი ნაწილი ფანჯრების და სათანადო ვენტილაციის გარეშეა,“ – ასე ხნის აჭარის საზოგადოებრივი მაუწყებელი ახალი შენობის საჭიროებას.
ამავე თემაზე:
საზოგადოებრივი მაუწყებელი ბათუმის სტუდიის ასაშენებლად 1 მილიონ ლარს დახარჯავს
საზოგადოებრივი მაუწყებელი ბათუმის ოფისის ყიდვისთვის დახარჯული თანხის ოდენობას ისევ მალავს
საზოგადოებრივმა მაუწყებელმა ბათუმში ოფისისთვის ფართობი იყიდა
