ქალაქის მერიის შპს „ბათუმის წყლის“ განცხადებით, საკანალიზაციო მასების სატუმბო სადგურებში ტუმბოები დაზიანდა, მათი დაუყოვნებლივ შეკეთებისთვის კი 232 ათას 475 ლარია საჭირო. ტუმბოებს კომპანია გადაუდებელი აუცილებლობით, ტენდერის გარეშე შეაკეთებს, რისთვისაც შესყიდვების სააგენტოს თანხმობისთვის უკვე მიმართა.
„სატუმბო სადგურებში სრული ფუნქციონირებისათვის საჭირო 8 ტუმბოს ნაცვლად ფუნქციონირებს 4 ტუმბო, რომლებიც არასაკმარისია ქალაქში წარმოშობილი საკანალიზაციო მასების სრულყოფილად გადასატუმბად… არსებული არასაკმარისი რაოდენობის ტუმბოები 24 საათის განმავლობაში მუშაობს მაქსიმალური დატვირთვით და შესაძლებელია მათი მწყობრიდან გამოსვლა [არარეკომენდებული დატვირთვის გამო ისინი დაზიანების ყოველდღიური რისკის ქვეშაა]. შესაძლებელია ქსელის გადავსების შემთხვევაში მოხდეს საკანალიზაციო მასების გადმოღვრა ჭებიდან, რისი ნიშნებიც უკვე არსებობს“, – აცხადებს „ბათუმის წყალი“.
ტუმბოების დაზიანების მიზეზად კომპანია ტურისტულ სეზონს ასახელებს: „ტუმბოების ხანგრძლივი ექსპლუატაციის და მაქსიმალური დატვირთვით მუშაობის გამო, რამაც განსაკუთრებით მოიმატა ტურისტული სეზონის აქტიურ ფაზასთან დაკავშირებით, მიმდინარე წლის ივლისის თვეში სატუმბ სადგურებში არსებული ტუმბოები დაზიანდა.
კომპანია განმარტავს, რომ „ქალაქ ბათუმის საკანალიზაციო მასები მანამ, სანამ ადლიის გამწმენდ სადგურში მოხვდება, თავს იყრის სატუმბო სადგურებში, მათ შორის, ორ მთავარ სატუმბო სადგურში – აბუსერიძის ქუჩაზე მდებარე A სატუმბ სადგურსა და ჯავახიშვილის ქუჩაზე მდებარე B სატუმბ სადგურში.“
სატუმბო სადგური / ფოტო: „ბათუმის წყალი“
„ბათუმის წყალი“ ტუმბოების ტენდერის გარეშე შეკეთებას შემდეგნაირად ასაბუთებს:
„შპს „ბათუმის წყალი“ პასუხისმგებელია ბათუმის საკანალიზაციო სისტემის მართვაზე, რომლის მთავარ რგოლს წარმოადგენს სატუმბოები და გამწმენდი ნაგებობები. საფრთხე ექმნება მათ ფუნქციონირებას, რამაც შეიძლება შეაფერხოს საკანალიზაციო მასების გადატუმბვა და გაწმენდა.
ტუმბოების ექსპლუატაციაში გაშვების გარეშე შეუძლებელი იქნება საკანალიზაციო მასების სრულყოფილი გადატუმბვა, რაც გამოიწვევს მასების გადმოღვრას და ქალაქის ცალკეული უბნების დატბორვას, გარემოს დაბინძურებას და საფრთხეს შეუქმნის მოსახლეობას ჯანმრთელობას, ასევე, შესაძლებელია დაიტბოროს სატუმბი სადგურები და არსებული ელექტრო-მექანიკური დანადგარებიც გამოვიდეს მწყობრიდან…“
„პრობლემის დროულად აღმოფხვრა მნიშვნელოვანია ზემოხსენებული საფრთხეების არსებობის გამო. ხოლო შესყიდვის ელექტრონული ტენდერით განხორციელების პროცედურა დაკავშირებულია კანონმდებლობით განსაზღვრულ ვადებთან და წინასწარ განუსაზღვრელ შედეგებთან… გარდა ამისა, შპს „ბათუმის წყლის“ მიერ ტარდება ბაზრის კვლევა ელექტრონული ტენდერის საშუალებით ახალი ტუმბოების შესასყიდად, ყველაზე მოკლე ვადაში არსებული პრობლემის მოგვარების საშუალება არის ტუმბოების შეკეთება, რომელიც იფუნქციონირებს არანაკლებ ახალი ტუმბოების შესყიდვის პერიოდისა“, – აღნიშნულია „ბათუმის წყლის“ განაცხადში.
მთავარი ფოტო: ადლიის გამწმენდი ნაგებობა / „ბათუმელების“ არქივიდან
